અમદાવાદમાં બેફામ રફ્તારનો કહેર: શાહપુરમાં કારચાલકે ડીવાઈડર કૂદાવ્યું, અકસ્માત બાદ ઉશ્કેરાયેલા ટોળાએ તોડફોડ કરી | Ahmedabad Shahpur Crash: Speeding Car Jumps Divider Mob Vandalises Vehicle
Ahmedabad Accident News: અમદાવાદ શહેરના કોટ વિસ્તારમાં આવેલા શાહપુરમાં મોડી રાત્રે પૂરપાટ ઝડપે દોડતી એક કારે અકસ્માત સર્જતા અફરાતફરી મચી ગઈ હતી. અકસ્માત બાદ કારચાલક પ્રત્યેનો લોકોનો રોષ ફાટી નીકળ્યો હતો અને મામલો તોડફોડ સુધી પહોંચ્યો હતો.
સ્ટીયરિંગ પરથી કાબુ ગુમાવતા સર્જાયો અકસ્માત
મળતી માહિતી અનુસાર, કારના ચાલકે ગફલતભરી રીતે ડ્રાઇવિંગ કરતા સ્ટીયરિંગ પરથી કાબુ ગુમાવ્યો હતો. બેફામ કારે રસ્તે પસાર થતા એક બાઈક સવારને જોરદાર ટક્કર મારી હતી. અકસ્માતની તીવ્રતા એટલી વધારે હતી કે કાર ડીવાઈડર કૂદાવી ગઈ હતી અને લોખંડની રેલિંગ તોડી નાખી હતી. આ રેલિંગ સીધી જ કાર પર ખાબકતા કારને પણ ભારે નુકસાન થયું હતું.
બાઈક સવારની હાલત ગંભીર
આ દુર્ઘટનામાં બાઈક સવાર યુવાનને શરીરે ગંભીર ઈજાઓ પહોંચી હતી. અકસ્માત થતા જ સ્થાનિક લોકો મદદ માટે દોડી આવ્યા હતા અને લોહીલુહાણ હાલતમાં ઈજાગ્રસ્તને તાત્કાલિક સારવાર માટે નજીકની હોસ્પિટલમાં ખસેડવામાં આવ્યો હતો. હાલ તેની સ્થિતિ નાજુક હોવાનું જાણવા મળી રહ્યું છે.
ટોળાએ કારમાં કરી તોડફોડ
અકસ્માતની જાણ થતા જ શાહપુર વિસ્તારમાં લોકોના ટોળેટોળા ઉમટી પડ્યા હતા. નિર્દોષ બાઈક સવારને અડફેટે લેનાર કારચાલક સામે લોકોમાં ભારે આક્રોશ જોવા મળ્યો હતો. ઉશ્કેરાયેલા ટોળાએ અકસ્માત સર્જનાર કારમાં તોડફોડ શરૂ કરી દીધી હતી. રાત્રિના સમયે થયેલા આ હોબાળાને કારણે સમગ્ર વિસ્તારમાં તંગદિલી સર્જાઈ હતી.
ઘટનાની જાણ થતા જ સ્થાનિક પોલીસનો કાફલો ઘટનાસ્થળે દોડી આવ્યો હતો અને પરિસ્થિતિ પર કાબુ મેળવ્યો હતો. હાલ પોલીસે તોડફોડ કરનારા ત્રણ શખસો સામે ગુનો નોંધી આગળની કાર્યવાહી હાથ ધરી છે.
