અટલાદરા કોઠી ફળિયામાં દૂષિત પાણી મુદે મહિલાઓનો વિરોધ : વેરો અને ચૂંટણી બહિષ્કારની ચીમકી | Women protest over contaminated water in Atladara : Threat of tax and election boycott
Vadodara : વડોદરા શહેરના અટલાદરા વિસ્તારમાં વોર્ડ નંબર 12 અંતર્ગત આવતા કોઠી ફળિયાની ગૃહિણીઓએ દૂષિત પાણીથી ભરેલી બોટલો હાથમાં લઈ મ્યુનિસિપલ કોર્પોરેશન અને સ્થાનિક નેતાઓ સામે વિરોધ પ્રદર્શન કર્યું હતું.
મહિલાઓએ જણાવ્યું કે, છેલ્લા ઘણા વર્ષોથી વિસ્તારમાં અવારનવાર દૂષિત પાણી આવવાની સમસ્યા છે, પરંતુ કાયમી ઉકેલ આવ્યો નથી. નળમાંથી આવતું પાણી પીળાશ પડતું અને તીવ્ર દુર્ગંધ ધરાવતું હોય છે, જે પીવા તો શું, ઘરવપરાશ માટે પણ અયોગ્ય છે. ઘરોની પાણીની ટાંકીઓમાં કાદવ-કિચડના થર જામી જાય છે. ફળિયાના રહેવાસીઓ પર પાણીના જગ અને ટેન્કર ખરીદવાની ફરજ પડી રહી છે.
મહિલાઓએ ઉમેર્યું કે, વારંવાર ફરિયાદ કર્યા બાદ તંત્ર દ્વારા માત્ર પાણીના સેમ્પલ લઈ જવામાં આવે છે, પરંતુ શુદ્ધ અને પૂરતા પ્રમાણમાં પાણી પૂરું પાડવા માટે કોઈ નક્કર પગલાં લેવામાં આવ્યાં નથી. ચૂંટણી સમયે મત માંગવા આવતા નેતાઓ પ્રત્યે ઊભરેલો રોષ વ્યક્ત કરતાં મહિલાઓએ કહ્યું કે, ચૂંટણીમાં નેતા વોટ માગવા આવે ત્યારે આ જ દૂષિત પાણી તેમને પીવડાવીશું.
ગૃહિણીઓએ સ્પષ્ટ શબ્દોમાં ચેતવણી ઉચ્ચારી છે કે, જો વહેલી તકે સમસ્યાનો કાયમી ઉકેલ નહીં આવે તો તેઓ મ્યુનિસિપલ વેરો ભરવાનો તેમજ આગામી ચૂંટણીનો બહિષ્કાર કરવા મજબૂર થશે.
