અમરેલી: ધારીના પ્રેમપરા પાસે ભયાનક અકસ્માત, કાર અચાનક પલટી ખાઇ જતા એકનું મોત, બે ઈજાગ્રસ્ત | amreli dhari prempara car accident cctv viral video 7 april 2026
Amreli Accident News: અમરેલી જિલ્લાના ધારી તાલુકામાં આવેલા પ્રેમપરા ગામ નજીક એક ગમખ્વાર અકસ્માત સર્જાયો છે. પુરપાટ ઝડપે જઈ રહેલી એક કાર ચાલકે સ્ટીયરીંગ પરથી કાબૂ ગુમાવતા કાર પલટી મારી ગઈ હતી. આ દુર્ઘટનામાં કારચાલકનું સારવાર દરમિયાન મોત નીપજ્યું છે, જ્યારે અન્ય બે યુવકો ગંભીર રીતે ઈજાગ્રસ્ત થયા હોવાનું સામે આવ્યું છે.
ત્રણ પલટી મારી કાર દૂર ફેંકાઈ
મળતી માહિતી અનુસાર, આ અકસ્માત એટલો ભયાનક હતો કે કારે હવામાં ત્રણ ગુલાટી મારી હતી. પુરપાટ ઝડપે દોડતી કાર અચાનક બેકાબૂ બની હતી અને રસ્તા પરથી ફંગોળાઈને પલટી મારી ગઈ હતી. ઘટનાને પગલે આસપાસના લોકો તાત્કાલિક મદદ માટે દોડી આવ્યા હતા અને ઈજાગ્રસ્તોને સારવાર અર્થે હોસ્પિટલ ખસેડ્યા હતા. જોકે, ગંભીર ઈજાઓને કારણે કારચાલકે દમ તોડ્યો હતો.
આ સમગ્ર અકસ્માતની ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ છે. વીડિયોમાં સ્પષ્ટ જોઈ શકાય છે કે કાર કેટલી ઝડપથી આવી રહી હતી અને પલટી ખાતી વખતે તેની સ્થિતિ કેટલી જોખમી હતી. હાલમાં આ સીસીટીવી ફૂટેજ સોશિયલ મીડિયામાં વાઈરલ થઈ રહ્યા છે, જે રસ્તા પર વાહન ચલાવતી વખતે સાવચેતી રાખવા માટેનો એક ચેતવણીરૂપ કિસ્સો બની રહ્યો છે.
પોલીસ તપાસ શરૂ
પ્રાથમિક તપાસમાં જાણવા મળ્યું છે કે ચાલકે કાર પરનો કાબૂ ગુમાવી દેતા આ ગોઝારી ઘટના ઘટી હતી. અન્ય બે ઘાયલ યુવકોની હાલત પણ ગંભીર હોવાનું જાણવા મળી રહ્યું છે અને તેમને વધુ સારવાર માટે રિફર કરવામાં આવ્યા છે. પોલીસે આ મામલે વધુ તપાસ હાથ ધરી છે.
