ગુજરાતમાં કિડનીના દર્દીઓ વધ્યાં, ટ્રાન્સપ્લાન્ટમાં 10 વર્ષમાં 50%નો વધારો, યુવાનોએ ટેન્શન વધાર્યું | kidney transplants up 50 percent gujarat youth at risk
Kidney Transplants Up 50% in Gujarat: ગુજરાતમાં કિડનીની સમસ્યા ધરાવતા દર્દીઓમાં ચિંતાજનક રીતે વધારો થઈ રહ્યો છે. અમદાવાદની સિવિલ મેડિસિટી ખાતે આવેલી કિડની હોસ્પિટલમાં કિડની ટ્રાન્સપ્લાન્ટ કરાવનારા દર્દીમાં છેલ્લા 10 વર્ષમાં 50 ટકાનો વધારો નોંધાયો છે. આ ઉપરાંત ગુજરાત ડાયાલિસિસ પ્રોગ્રામ હેઠળ એક વર્ષમાં રાજ્યમાં ડાયાલિસિસ કરાવનારાની સંખ્યા 5.61 લાખને પાર થઈ ગઈ છે.
ટ્રાન્સપ્લાન્ટમાં રેકોર્ડબ્રેક વધારો
સિવિલની કિડની હોસ્પિટલમાં વર્ષ 2016માં કિડની ટ્રાન્સપ્લાન્ટ કરાવનારા દર્દીઓની સંખ્યા 341 હતી અને તે હવે 2025માં વધીને 500 થઈ ગઈ છે. ગયા વર્ષે 500 કિડની ટ્રાન્સપ્લાન્ટ થયેલા હતા, તેમાંથી 330 દર્દી ગુજરાતના અને 170 ગુજરાત બહારના હતા. કુલ કિડની ટ્રાન્સપ્લાન્ટમાંથી 157 કેડેવર, 49 સ્વેપ ટ્રાન્સપ્લાન્ટથી થયેલા હતા. હાલ રજાના દિવસોને બાદ કરવામાં આવે તો દરરોજ સરેરાશ બેથી વધુ કિડની ટ્રાન્સપ્લાન્ટ સિવિલમાં થાય છે.
યુવાનોમાં વધતું કિડનીનું જોખમ
વર્ષ 2024માં 436 અને વર્ષ 2023માં 353 દર્દીઓનું કિડની ટ્રાન્સપ્લાન્ટ કરાયું હતું. આમ, કિડની ટ્રાન્સપ્લાન્ટ કરાવનારા દર્દીના પ્રમાણમાં ચિંતાજનક વધારો થઈ રહ્યો છે. બીજી તરફ ગુજરાત ડાયાલિસિસ પ્રોગ્રામ હેઠળ વર્ષ 2025માં 5.61 લાખ દર્દીનું ડાયાલિસિસ કરવામાં આવ્યું હતું. આમ, દરરોજ સરેરાશ 1538 દર્દીને ડાયાલિસિસની પ્રક્રિયામાંથી પસાર થવું પડે છે. સિવિલની કિડની હોસ્પિટલમાં 2006ના વર્ષથી કિડની હોસ્પિટલમાં ટ્રાન્સપ્લાન્ટ કરાવનારા દર્દીઓની સંખ્યા 200ને પાર રહી છે. હવે ખાસ કરીને યુવાનોમાં કિડનીની સમસ્યામાં વધારો જોવા મળ્યો છે.
આ પણ વાંચો: પોલીસ સ્ટેશનો ઉપર ગ્રેનેડ હુમલા કરાવતો આતંકવાદીનો સાગરિત ડીસાથી ઝડપાયો
કિડનીની સમસ્યા વધવાનું કારણ
– ડાયાબિટીસ અને બ્લડપ્રેશરના કેસમાં વધારો. ડાયાબિટીસ લાંબા સમય સુધી અનકંટ્રોલ રહેતા કિડનીને અસર થાય છે.
– વધુ મીઠું, તેલિયું અને પ્રોસેસ્ડ ફૂડ, ફાસ્ટ ફૂડની વધતી ટેવ.
– પાણી ઓછું પીવું.
– કસરતનો અભાવ.
– પેઇનકિલર અને સ્ટેરોઇડ્સનો લાંબા સમય સુધી ઉપયોગ. ડોક્ટરની સલાહ વગર દવા લેવાથી કિડની ધીમે-ધીમે ખરાબ થાય છે.
– કેટલાક વિસ્તારોમાં હાર્ડ વોટર અથવા કેમિકલ મિશ્રિત પાણી, ફ્લોરાઇડ/નાઇટ્રેટની માત્રા વધારે હોવી.
– જાગૃતિ અને ડાયગ્નોસિસ વધવું. આ પણ એક મહત્ત્વનું કારણ છે. હવે વધુ ટેસ્ટિંગ થાય છે, લોકો સમયસર ચેકઅપ કરાવે છે.
