સીસીસી પરીક્ષામાં 32690 અધિકારીઓ અને કર્મચારીઓ પાસ, 11578 નાપાસ | 32000 government employee pass in ccc exam conducted at msu
વડોદરાઃ સરકારના તમામ વિભાગોમાં ફરજ બજાવતા અધિકારીઓ તેમજ કર્મચારીઓ માટે કોમ્પ્યુટર જાણકારી માટેની સીસીસી( કોમ્યુટર કોમ્પિટન્સી કોર્સ)ની પરીક્ષા પાસ કરવી ફરજિયાત છે.જો આ પરીક્ષા પાસ ના કરી હોય તો બઢતી અને બીજા પણ લાભો મળતા નથી.
સરકારે આ પરીક્ષા લેવા માટે ગુજરાતમાં જે યુનિવર્સિટીઓને જવાબદારી સોંપી છે તેમાં એમ.એસ.યુનિવર્સિટીનો પણ સમાવેશ થાય છે.મધ્ય ગુજરાતમાં આ પરીક્ષા લેનાર એક માત્ર યુનિવર્સિટી છે.યુનિવર્સિટીના કોમ્પ્યુટર સેન્ટર પાસે આ પરીક્ષાની તમામ જવાબદારી છે.
મળતી વિગતો પ્રમાણે ૨૦૧૫થી યુનિવર્સિટીમાં પરીક્ષા લેવાનું શરુ કરાયું છે અને અત્યાર સુધીમાં ૪૪૨૬૮ અધિકારીઓ- કર્મચારીઓ અહીંયા પરીક્ષા આપી ચૂકયા છે.આ પૈકી ૩૨૬૯૦ પાસ થયા છે અને ૧૧૫૭૮ નાપાસ થયા છે.
પરીક્ષા લેવાનું સતત ચાલું જ રહે છે.કોરોનાના સમયગાળમાં પણ સેન્ટર દ્વારા ઉમેદવારો ઘરેથી ઓનલાઈન પરીક્ષા આપી શકે તેવી વ્યવસ્થા કરાઈ હતી.ઉમેદવારોની સંખ્યાના આધારે કેટલી વખત પરીક્ષા લેવી તે નક્કી કરવામાં આવે છે.ગમે તે ઉમેદવાર ગમે તે જગ્યાએથી સીસીસી પરીક્ષા આપી શકે છે પણ યુનિવર્સિટીમાં પરીક્ષા આપનાર મોટાભાગના ઉમેદવારો વડોદરા કે મધ્ય ગુજરાતમાં ફરજ બજાવનારા હોય છે.કેટલાક ઉમેદવારો સાત થી આઠ વખત નાપાસ થયા હોવાનું પણ નોંધાયું છે.
થીયરી પરીક્ષા માટે ૫૦૦૦ પ્રશ્નોની બેન્ક
સૂત્રોનું કહેવું છે કે, સીસીસી પરીક્ષાનું મોડેલ યુપીએસસી માટે તાલિમ આપતી સંસ્થા સ્પિપા દ્વારા તૈયાર કરાયું છે.જેમાં ૫૦ માર્કના થિયરી અને ૫૦ માર્કના પ્રેક્ટિકલ પ્રશ્નો હોય છે.યુનિ.ના કોમ્પ્યુટર સેન્ટર દ્વારા પ્રેક્ટિકલ પરીક્ષા માટેના ૨૦૦ પ્રશ્નો અને થિયરી માટેના ૫૦૦૦ પ્રશ્નોની બેન્ક તૈયાર કરવામાં આવી છે.જેથી પરીક્ષામાં પ્રશ્નો રીપિટ ના થાય.પરીક્ષામાં વર્ડ, એક્સેલ, પાવર પોઈન્ટ પ્રેઝન્ટેશન અને કોમ્પ્યુટર ઓપરેટિંગને લગતી જાણકારી ઉમેદવાર પાસે છે કે નહીં તેની ચકાસણી કરતા પ્રશ્નો પૂછવામાં આવે છે.કેટલાક અધિકારીઓ અને કર્મચારીઓ માટે પરીક્ષા પાસ કરવી મુશ્કેલ સાબિત થાય છે.આ પૈકીના કેટલાક તો એક સાથે પાંચ- પાંચ ફોર્મ પણ ભરતા હોય છે.
