બરોડા બેડમિન્ટન એસોસિએશનની વાર્ષિક સામાન્ય સભા યોજાઈ | Baroda Badminton Association Annual General Meeting held
બરોડા બેડમિન્ટન એસોસિએશનની વાર્ષિક સામાન્ય સભાદરમિયાન રાજ્ય, રાષ્ટ્રીય અને આંતરરાષ્ટ્રીય કક્ષાએ નોંધપાત્ર પ્રદર્શન કરનાર ખેલાડીઓને સન્માનિત કરાયા હતા.
સભાની શરૂઆતમાં એસોસિએશનના પ્રમુખ ગીરીશ પટેલ દ્વારા સ્વ. એસ.ટી. દેસાઈને શ્રદ્ધાંજલિ અર્પણ કરાઈ હતી. ત્યારબાદ વર્ષ દરમિયાન એસોસિએશન દ્વારા કરવામાં આવેલી વિવિધ પ્રવૃત્તિઓનો અહેવાલ રજૂ કરાયો હતો. જેમાં ખાસ કરીને ગુજરાત રાજ્યની તમામ વય જૂથની સ્પર્ધાઓ તથા અંડર-૧૧ રાષ્ટ્રીય ચેમ્પિયનશિપનું સફળ આયોજન કરાયું હોવાનો ઉલ્લેખ કર્યો હતો.
આગામી વર્ષો માટે કારોબારી સમિતિની સર્વાનુમતે નિમણૂંક કરાઈ હતી, તેમજ એસોસિએશન ખેલાડીઓ માટે કોચિંગ માટેની સુવિધા પુરી પાડશે તેવું જણાવ્યું છે. એસોસિએશનના હોદ્દેદારોએ જણાવ્યું હતું કે, બેડમિન્ટન રમતના સર્વાગી વિકાસ માટે સૌના સહકારની અત્યંત જરૂર છે.
વડોદરાના બેડમિન્ટન ખેલના અર્જુન એવોર્ડી પાર્થો ગાંગુલીએ ખેલાડીઓને શિસ્ત, મહેનત અને સંકલ્પ સાથે આગળ વધવા પ્રોત્સાહિત કર્યા હતા. આ દરમિયાન ૬૬ બેડમિન્ટન ખેલાડીઓને વિવિધ વય જૂથમાં તેમની સિદ્ધિઓ બદલ અભિનંદન આપ્યા હતા. ખેલાડીઓ તરફથી પણ પોતાના વિચારો રજૂ કરાયા હતા.
