પત્ની હેરાન કરે છે, નજીક આવશો તો કુદી પડીશ..! કોમ્પ્લેક્સ પર ચડી ગયેલા યુવકના રેસ્ક્યુ માટે હાઈ વૉલ્ટેજ ડ્રામા | I will jump off High voltage drama to rescue a young man who climbed onto complex at vadodara
Vadodara : વડોદરાના વડસર વિસ્તારમાં આજે બપોરે એક યુવકે ટેરેસ પરથી કૂદી પડવાની ધમકી આપી ધાંધલ મચાવતા હાઇવોલ્ટેજ ડ્રામા સર્જાયો હતો.
વડસર બ્રિજ પાસે માતૃકા રેસીડેન્સી નામના કોમ્પલેક્ષની ટેરેસ ઉપર ચડી ગયેલા 35 વર્ષે આકાશ નામના યુવકે કુદી પડવાની ધમકી આપતા લોકો ભેગા થઈ ગયા હતા. આ યુવક ટેરેસ ઉપર માતૃકા સોસાયટીના લખેલા કોર્નર ઉપર રોડ તરફ પગ લટકાવીને બેસી ગયો હતો.
પોલીસ તેમજ ફાયર બ્રિગેડને જાણ કરાતા ટીમો આવી ગઈ હતી અને ટેરેસ ઉપર બેઠેલા યુવક સાથે વાતચીત ચાલુ કરી હતી. જે દરમિયાન આકાશ તેની પત્ની હેરાન કરે છે, ચાલી ગઈ છે તેમ કહી નજીક આવશો તો કુદી પડીશ એવી ધમકી આપતો હતો.
લગભગ અડધો કલાક સુધી ડ્રામા થયા બાદ પોલીસ અને ફાયર બ્રિગેડના જવાનોએ તેને વાતોમાં પરોવી નજર ખસતા જ તરાપ મારીને પકડી લીધો હતો. જેથી લોકોએ તાળીઓ પાડી તેમની કામગીરીને વધાવી હતી. ત્યારબાદ આકાશને કાઉન્સિલિંગ માટે માંજલપુર પોલીસ સ્ટેશનમાં લઈ જવામાં આવ્યો હતો. સમગ્ર બનાવવા પાછળ પ્રેમ પ્રકરણ હોવાનું પણ ચર્ચાઈ રહ્યું છે.
