નડિયાદની ઇડન ગાર્ડન સોસાયટી પાસે ગેસ લાઇન ફાટતા નાસભાગ | Stampede after gas line bursts near Eden Garden Society in Nadiad
પીજ રોડની ઘટનાથી લોકો બહાર દોડી આવ્યાં
500 ઘરોમાં બે કલાક ગેસ પુરવઠો બંધ રહેતા ગૃહિણીઓને મુશ્કેલી, તાકીદે ગેસ પુરવઠો પૂર્વવત કરાયો
નડિયાદ: નડિયાદના પીજ રોડ પર આવેલી ઈડન ગાર્ડન સોસાયટી પાસે જીએસપીસીની મુખ્ય ગેસ પાઈપલાઈન અચાનક ફાટતા નાસભાગ મચી ગઇ હતી અને ગેસલીકેજ થયો હતો. અંદાજે ૫૦૦ થી વધુ ઘરોનો રાંધણ ગેસ પુરવઠો બે કલાક સુધી ખોરવાઈ જતાં સ્થાનિક રહીશો અને ગૃહિણીઓમાં ભારે હાલાકીનો સામનો કરવો પડયો હતો.
નડિયાદ શહેરના પીજ રોડ પર આવેલી ઈડન ગાર્ડન સોસાયટી પાસે પસાર થતી જીએસપીસીની મુખ્ય ગેસ પાઈપલાઈન જોરદાર અવાજ સાથે ફાટતા સમગ્ર વિસ્તારમાં દોડધામ મચી ગઈ હતી. પાઈપલાઈનમાં ભંગાણ પડતાની સાથે જ અતિશય દબાણ સાથે ગેસ હવામાં ફેલાવા લાગ્યો હતો. જેને કારણે વાહનચાલકો થંભી ગયા હતા અને રસ્તા પર ટ્રાફિક જામ જેવી સ્થિતિ સર્જાઈ હતી. તીવ્ર વાસ અને અવાજને કારણે સોસાયટીના રહીશો ભયભીત થઈ ઘરની બહાર દોડી આવ્યા હતા. કોઈ મોટી હોનારત ન સર્જાય તે માટે જાગૃત નાગરિકોએ તાત્કાલિક અસરગ્રસ્ત વિસ્તારમાં પાણીનો છંટકાવ શરૂ કરી ગેસની અસર ઘટાડવા પ્રયાસ કર્યો હતો.
ઘટનાની જાણ થતા જ ગેસ કંપનીની ટેકનિકલ ટીમ અને ફાયર વિભાગનો કાફલો સ્થળ પર દોડી આવ્યા હતો. સાવચેતીના ભાગરૂપે મુખ્ય લાઈનનો ગેસ સપ્લાય તાત્કાલિક બંધ કરી દેવામાં આવ્યો હતો. જેના કારણે આસપાસના ૫૦૦ થી વધુ મકાનોમાં રાંધણ ગેસનો પુરવઠો ખોરવાઈ ગયો હતો. રસોઈના સમયે જ ગેસ બંધ થઈ જતાં અનેક પરિવારો અટવાયા હતા અને લોકોમાં તંત્ર સામે રોષ જોવા મળ્યો હતો.
અંદાજે બે કલાકની જહેમત બાદ ટેકનિકલ ટીમે યુદ્ધના ધોરણે સમારકામ હાથ ધરી પુરવઠો પુનઃ સ્થાપિત કરવાની કામગીરી પૂર્ણ કરી હતી. સદનસીબે મોટી જાનહાનિ ટળતા તંત્રએ રાહતનો શ્વાસ લીધો હતો.
