ગીરગઢડામાં અઢી ઈંચ, તાલાલા, ઉનામાં અર્ધો ઈંચ સાથે વીજળી પડતા 3ને ઈજા | 3 injured in lightning strike with two and a half inches in Girgadha half an inch in Talala Una
તા. 22 અને 26 માર્ચે વધુ બે વેસ્ટર્ન ડિસ્ટર્બન્સ : રાજ્યમાં અન્યત્ર માવઠાંનો વિરામ : સવારે ગુલાબી ઠંડી : આજથી સુકા હવામાન સાથે તાપમાન 5 સે.સુધી વધશે
રાજકોટ, : ગુજરાતમાં ગઈકાલે 25 જિલ્લાઓ અને 125 જેટલા તાલુકાઓમાં ગાજવીજ અને વાવાઝોડા સાથે કમોસમી વરસાદ બાદ આજે ગીર સોમનાથ જિલ્લાના ગીરગઢડામાં બપોર બાદ સાંજે 2થી 6 દરમિયાન ધોધમાર 66 મિ.મિ. (અઢી ઈંચ) તથા ઉના અને તાલાલા તાલુકામાં અર્ધો ઈંચ વરસાદ ખાબકયો હતો.જ્યારે રાજ્યમાં અન્યત્ર તડકો નીકળ્યો હતો અને માવઠાંનો વિરામ રહ્યો હતો.
સોરઠમાં સામતેર, કાણકબરડા, ગરાળ, સુલતાન પુર સહિત ગ્રામ્ય વિસ્તારમાં આશરે 1 ઈંચ વરસાદના વાવડ છે જ્યારે ગીરગઢડામ તા.ના સનવાવ ગામે વીજળી પડતા એક ભેંસનું મૃત્યુ નીજ્યાનું અને વેળાકોટમાં વીજળી પડતા ત્રણ બહેનોને ગંભીર ઈજા પહોંચી હતી.
ગઈકાલના વ્યાપક માવઠાંથી આજે સવારે રાજ્યમાં ઓખા,દ્વારકા,સુરતમાં 20 અને બાકીના તમામ સ્થળે તાપમાન 20 સે.ની નીચે 17-18 સે.એ પહોંચી જતા કુદરતી એ.સી.જેવી ગુલાબી ઠંડક અનુભવાઈ હતી, બપોરનું તાપમાન પણ રાજકોટ (૩૩.૯) સિવાયના સ્થળોએ ૩૩ સે.નીચે રહ્યું હતું.
આવતીકાલથી 4 દિવસમાં રાજ્યમાં બપોરના મહત્તમ તાપમાનમાં 5 સે. સુધીનો અને સવારના તાપમાનમાં પણ 2થી 3 સે.નો વધારો થવાની આગાહી મોસમ વિભાગે કરી છે. આ ઉપરાંત હજુ દેશમાં તા. 22ના નબળા વેસ્ટર્ન ડિસ્ટર્બન્સ અને ત્યારબાદ તા. 26ના વધુ એક સીસ્ટમ સક્રિય થવાની શક્યતા છે જે સ્થિતિમાં આગામી માર્ચ એન્ડ સુધી એકંદરે ગુજરાતમાં હીટવેવની શક્યતા નહીવત્ છે પરંતુ, સવાર-બપોરનું તાપમાન સામાન્ય કરતા વધારે રહેશે.
