વધુ રૂા. 10 લાખનો હાઇબ્રિડ ગાંજો કબ્જે : મુંબઇથી સ્પિકરમાં જથ્થો આવતો | More than Rs 10 lakh worth of hybrid ganja seized: The quantity was coming from Mumbai to Speaker
મૂળ મુંબઇના અને હાલ રાજકોટ રહેતા યુવકની પૂછપરછમાં ચોંકાવનારા ખુલાસા : મોટાભાગના ગ્રાહકો છાત્રો છે : 6 માસથી હાઇબ્રિડ ગાંજાનો વેપલો કરતો હતો
રાજકોટ, : રાજકોટનાં ઇતિહાસમાં પહેલી વખત હાઇબ્રિડ ગાંજો પકડાયો છે. મુખ્ય આરોપી ધ્રૂવ સંજયભાઇ જોશી (ઉ.વ. 26) પાસેથી એસઓજીએ વધુ 296 ગ્રામ હાઇબ્રિડ ગાંજો કબ્જે કર્યો છે. છેલ્લા છએક માસથી હાઇબ્રિડ ગાંજાનો વેપલો કરતો હોવાનું બહાર આવ્યું છે. મોટાભાગનાં ગ્રાહકો છાત્રો હોવાની વાતથી SOGચોંકી ઉઠી છે.
મૂળ મુંબઇના અને છેલ્લા દસેક વર્ષથી રાજકોટમાં રહેતા ધ્રૂવને એસઓજીએ 69 ગ્રામ હાઇબ્રિડ ગાંજા સાથે ઝડપી લીધો હતો. તેના પાંચ દિવસના રિમાન્ડ મેળવી ઘનીષ્ઠ પૂછપરછ કરતાં બીગ બજાર નજીક જગન્નાથ ચોકમાં અમરનાથ મેઇન રોડ પર ભાડે રાખેલા મકાનમાં પણ હાઇબ્રિડ ગાંજો છુપાવ્યાની કબૂલાત આપી હતી. જેના આધારે એસઓજીના પીએસઆઇ એમ.વી. જાડેજાએ ત્યાં દરોડો પાડતા રૂા. 10.36 લાખની કિંમતનો 296 ગ્રામ હાઇબ્રિડ ગાંજો મળી આવ્યો હતો.
પૂછપરછમાં ધ્રૂવે એવી પણ કબૂલાત આપી હતી કે મુંબઇમાં રહેતો ત્યારે જ ગાંજો પીવાના રવાડે ચડી ગયો હતો. છેલ્લા છ માસથી તેણે ગાંજાનો વેપલો શરૂ કર્યો હતો. મુંબઇના મીરાં રોડ પર રહેતા સપ્લાયર પાસે જઇ ગાંજાનો સોદો કરતો હતો. સોદો કર્યા બાદ તે ટ્રેન કે બસમાં રાજકોટ આવી જતો હતો. ત્યાર પછી સપ્લાયર તેને કુરિયરમાં સ્પીકર અને બીજી ઇલેક્ટ્રોનિક આઇટમ સાથે હાઇબ્રિડ ગાંજો મોકલી આપતો હતો, જે લેવા પોતે જતો નહીં- તેને બદલે મિત્રને મોકલી દેતો હતો.
ત્રણેક વખત તેણે આ રીતે હાઇબ્રિડ ગાંજો મંગાવ્યો હતો. છેલ્લે રૂા. 2.80 લાખમાં 500 ગ્રામ હાઇબ્રિડ ગાંજો મંગાવ્યો હતો. જેમાંથી અંદાજે 135 ગ્રામ ગાંજો વેંચી દીધો હતો. બાકીનો અંદાજે 365 ગ્રામ ગાંજો SOGએ કબ્જે કર્યો છે. તેના મોટાભાગના ગ્રાહકો હોસ્ટેલ, પી.જી.માં રહેતા અને કોલેજમાં ભણતા સ્ટુડન્ટો છે, જેમને રૂા. 2000 લેખે 1 ગ્રામ ગાંજો વેંચતો હતો.
SOGએ હવે તેના કસ્ટમરોમાં ક્યા-ક્યા છાત્રો હતાં તેના વિશે માહિતી મેળવવા તજવીજ શરૂ કરી છે. એટલું જ નહીં અમુક કારખાનેદારો પણ કસ્ટમરો હોવાની માહિતી મળતા તે દિશામાં પણ તપાસ શરૂ કરી છે. હાલમાં આઠેક કસ્ટમરોની માહિતી મળી છે. પરંતુ તેની સંખ્યા વધુ હોવાનું એસઓજી માની રહી છે.
શહેરમાં આ અગાઉ પણ સિન્થેટિક અને મોંઘાદાટ એમ.ડી. જેવા ડ્રગ્સનાં જે પણ રેકેટ બહાર આવ્યા છે તેમાં પણ મુખ્યત્વે છાત્રો જ કસ્ટમરો હોવાનું બહાર આવતું રહ્યું છે. આ સ્થિતિમાં હવે એસઓજી અને બીજી એજન્સીઓ માટે યુવાધન અને છાત્રોને ડ્રગ્સમાંથી મુક્તિ અપાવવાનો નવો પડકાર સર્જાયો છે.
