બિચ્છુ ગેંગના સુત્રધાર અસલમ બોડીયાના જામીન સુપ્રીમ કોર્ટ દ્વારા નામંજૂર | Supreme Court rejects bail of Bicchu gang leader Aslam Bodia
Vadodara : વડોદરા શહેરમાં આતંક ફેલાવનાર બિચ્છુ ગેંગના મુખ્ય સુત્રધાર અસલમ ઉર્ફે બોડીયો હૈદરમીયા શેખને સુપ્રીમ કોર્ટમાંથી મોટો ઝટકો મળ્યો છે. ગુજસીટોક હેઠળ નોંધાયેલા ગુનામાં તેની જામીન અરજી સુપ્રીમ કોર્ટે નામંજૂર કરી દીધી છે.
માહિતી મુજબ, નવાપુરા મહેબુબપુરા વિસ્તારમાં રહેતો અસલમ બોડીયો પોતાના સાગરીતો સાથે મળી બિચ્છુ ગેંગ ચલાવતો હતો અને શહેરમાં સંગઠિત ગુનાઓ આચરતો હતો. ગેંગ દ્વારા મિલકતો બળજબરીથી કબજે કરવી, ખંડણી વસૂલવી, તેમજ હત્યા, લૂંટ, અપહરણ અને છેતરપીંડી જેવા ગંભીર ગુનાઓ આચરી શહેરમાં ભયનો માહોલ ઉભો કર્યો હતો.
વર્ષ 2021માં વડોદરા ક્રાઇમ બ્રાન્ચે ગુજસીટોક હેઠળ ગુનો નોંધી અસલમ બોડીયાની ધરપકડ કરી હતી. શરૂઆતમાં તેને વડોદરા જેલમાં રાખવામાં આવ્યો હતો, પરંતુ જેલમાંથી પણ તે ગુનાહિત પ્રવૃત્તિઓ ચાલુ રાખતો હોવાની માહિતી સામે આવતા તેને ભુજ અને બાદમાં રાજકોટ જેલમાં ટ્રાન્સફર કરવામાં આવ્યો હતો.
અગાઉ અસલમે સ્પેશિયલ ગુજસીટોક કોર્ટ અને ગુજરાત હાઈકોર્ટમાં જામીન માટે અરજી કરી હતી, પરંતુ બંને કોર્ટોએ તેની ગંભીર ગુનાહિત ભૂતકાળને ધ્યાનમાં રાખી અરજી નામંજૂર કરી દીધી હતી. ત્યારબાદ તેણે સુપ્રીમ કોર્ટનો દરવાજો ખખડાવ્યો હતો, જ્યાં પણ પોલીસ દ્વારા રજૂ કરાયેલા મજબૂત પુરાવા અને દલીલોના આધારે 18 માર્ચ 2026ના રોજ તેની જામીન અરજી ફગાવી દેવામાં આવી હતી. ઉલ્લેખનીય છે કે અસલમ બોડીયા સામે હત્યા, હત્યાનો પ્રયાસ, લૂંટ, ખંડણી, ધમકી, રાયોટિંગ અને જુગાર સહિતના કુલ 64 જેટલા ગુનાઓ શહેરના અલગ-અલગ પોલીસ સ્ટેશનોમાં નોંધાયેલા છે. તેની ગુનાહિત પ્રવૃત્તિઓને કારણે તેને 10 વખત પાસા પણ થઈ ચૂકી છે.
