શહેરમાં કોલસાની ડિમાન્ડમાં ૨૫ ટકાનો વધારો, રોજ ૫૦૦૦ કિલો કોલસાનું વેચાણ | coal demand for cooking on rise in vadodara
વડોદરાઃ અખાતી દેશોમાં ચાલી રહેલા યુધ્ધના કારણે ગેસ સિલિન્ડર માટે ખેંચતાણ જોવા મળી રહી છે અને તેના કારણે વર્ષો બાદ ફરી એક વખત કોલસાની બોલબાલા વધી રહી છે.વડોદરા શહેરમાં કોલસાની માગમાં ૨૫ ટકાનો વધારો નોંધાયો છે અને એક અંદાજ પ્રમાણે શહેરમાં કોલસાનું રોજિંદુ વેચાણ હવે ૫૦૦૦ કિલો સુધી પહોંચી ગયું છે.
એક સમયે વડોદરામાં કોલસાનું વેચાણ કરતી ૮૦ જેટલી દુકાનો હતી પણ ગેસ સિલિન્ડરના, ગેસ પાઈપ લાઈનના જોડાણો વધ્યા બાદ કોલસાની જરુરિયાત ઓછી થવા માંડી હતી અને હવે માંડ ૯ દુકાનો રહી છે.આ પૈકી ૩ દુકાનો ચાર દરવાજા વિસ્તારમાં છે.કોલસાના વેપારીઓ કહે છે કે, ગેસ સિલિન્ડર હોટલો અને રેસ્ટોરન્ટોમાં તંદુર માટે પહેલા પણ કોલસો વપરાતો હતો પણ કોમર્શિયલ ગેસ સિલિન્ડરની અછત સર્જાઈ છે ત્યારથી હોટલો અને રેસ્ટોરન્ટોએ કોલસાની ખરીદી વધારી દીધી છે.રેસ્ટોરન્ટોના સંચાલકો કેટલીક વાનગીઓ કોલસા પર બનાવી રહ્યા છે તો છુટક ગ્રાહકો તથા ખાણી-પીણીની લારીઓ વાળા પણ હવે ભોજન કે ચા બનાવવા માટે કોલસો લઈ જઈ રહ્યા છે.આમ ઈલેક્ટ્રિક સગડીની સાથે સાથે કોલસાની બોલબાલા વધી છે.જોકે ડિમાન્ડ વધ્યા બાદ પણ કોલસાના ભાવમાં વધારો થયો નથી.કોલસા પ્રતિ કિલો અને ગુણવત્તા પ્રમાણે ૩૦ થી ૩૫ રુપિયે કિલોના ભાવે વેચાઈ રહ્યા છે.
લોકો કોલસાની સગડીનો ઉપયોગ કરવા માંડયા છે
કોલસાના વેપારી મહંમદભાઈ કહે છે કે, પહેલા મારે ત્યાં રોજ ૪૦૦ કિલો જેટલો કોલસો વેચાતો હતો અને હવે ૫૦૦ કિલો કોલસાનું વેચાણ થાય છે.છુટક ગ્રાહકો હવે કોલસાની સગડીનો ઉપયોગ કરી રહ્યા હોવાથી કોલસો ખરીદવા અમારે ત્યાં આવે છે.જોકે ભાવમાં વધારો થયો નથી.
માગ વધવા છતા કોલસાનો પૂરતો પુરવઠો, ભાવ વધારો નથી
વેપારી હેમાંગભાઈ ઠક્કરનું કહેવું છે કે, મારે ત્યાં પહેલા ૪૦ ગુણ કોલસો વેચાતો હતો અને માગ વધવાથી હવે રોજ ૫૦ ગુણ કોલસાનું વેચાણ થાય છે.જોકે ડિમાન્ડ વધ્યા પછી પણ કોલસાનો પુરવઠો પર્યાપ્ત છે અને કોઈ જાતનો ભાવ વધારો પણ થયો નથી એટલે લોકોએ ભાવ વધારાની અફવા પર ધ્યાન આપવાની જરુર નથી.નજીકના ભવિષ્યમાં કોલસાના પુરવઠા પર અસર થવાની શક્યતા નથી.
