કપડવંજના વાઘાવત ગામેથી રૂ. 3.99 લાખના વિદેશી દારૂ સાથે શખ્સ ઝડપાયો | Man arrested with foreign liquor worth Rs 3 99 lakh from Vaghawat village of Kapadvanj
– દારૂનો જથ્થો પૂરો પાડનાર શખ્સની શોધખોળ
– પોલીસે વિદેશી દારૂનો જથ્થો, મોબાઈલ સહિતનો રૂ. 4 લાખથી વધુની મત્તા જપ્ત કરીને ગુનો નોંધ્યો
નડિયાદ : ખેડા જિલ્લાના કપડવંજ તાલુકામાં આવેલા વાઘાવત ગામે આંતરસુબા પોલીસે સીમ વિસ્તારમાં દરોડો પાડી ગૌચરની જમીનમાં છુપાવેલો વિદેશી દારૂનો મોટો જથ્થો પકડી પાડયો છે. પોલીસે ૪,૦૪,૮૧૦ની કિંમતનો મુદ્દામાલ જપ્ત કરી એક શખ્સની ધરપકડ કરી છે, જ્યારે આ માલ પૂરો પાડનાર અન્ય એક શખ્સને વોન્ટેડ જાહેર કરી તપાસના ચક્રો ગતિમાન કર્યા છે.
આંતરસુબા પોલીસ સ્ટેશનના કર્મચારીઓ વાઘાવત કેનાલ પાસે પેટ્રોલિંગમાં હતા, તે દરમિયાન ચોક્કસ બાતમી મળી હતી કે, વાઘાવત ગામના સીમ વિસ્તારમાં રહેતા મહેન્દ્રકુમાર ઉર્ફે ચીનો જવાનસિંહ સોલંકીએ પોતાના ઘરની પાસે આવેલી ગૌચરની જમીનમાં વિદેશી દારૂનો જથ્થો સંતાડયો છે. પોલીસે પંચોને સાથે રાખી સ્થળ પર દરોડો પાડતા અલગ અલગ બ્રાન્ડની વિદેશી દારૂની બોટલો અને ક્વાર્ટર મળી આવ્યા હતા. તપાસ દરમિયાન રોયલ ચેલેન્જ વ્હીસ્કીની ૮૩ બોટલ, રોયલ સ્ટેગની ૧૨ બોટલ, ઓલ સીઝન્સ ગોલ્ડ કલેક્શનની ૯ મોટી બોટલ અને ૩૮૫ નંગ ક્વાર્ટર સહિત વ્હાઇટ લેસ વોડકાના ૨૭૨ ક્વાટર અને કિંગફિશર બીયરના ૧૨૨ ટીન મળી આવ્યા હતા. પોલીસે સ્થળ પરથી મહેન્દ્રકુમાર સોલંકીની અટકાયત કરી પૂછપરછ કરતા તેણે કબૂલાત કરી હતી કે, આ દારૂનો જથ્થો બે દિવસ પહેલા કાકરખાંડ ગામનો પરેશ રસિકભાઈ શર્મા પોતાની ગાડીમાં લઈને આવ્યો હતો અને તેને સાચવવા માટે આપ્યો હતો. પોલીસે આરોપીની અંગ ઝડતી લેતા તેની પાસેથી ૧૨૦ રૂપિયા રોકડા અને ૫૦૦૦ની કિંમતનો મોબાઈલ ફોન મળી આવ્યો હતો. પોલીસે કુલ રૂપિયા ૩,૯૯,૬૯૦ની કિંમતનો દારૂ અને અન્ય ચીજવસ્તુઓ મળી કુલ ૪,૦૪,૮૧૦નો મુદ્દામાલ કબજે લીધો છે. પોલીસે બંને શખ્સો વિરૂદ્ધ પ્રોહિબિશન એક્ટ મુજબ ગુનો નોંધી ફરાર પરેશ શર્માને પકડવા તજવીજ હાથ ધરી છે.
