નેશનલ હાઇવે ૪૮ પર ટ્રકના તોતિંગ પૈંડા નીચે કચડાઇ જતા સાસુ અને જમાઇના કરૃણ મોત | Mother in law and son in law die after being crushed under the wheels of a truck
વડોદરા,દીકરીની સગાઇની વાત કરવા જતા પિતા, માતા અને નાનીને નેશનલ હાઇવે પર ટ્રક ચાલકે ટક્કર મારી હતી. ટ્રકના પૈંડા ફરી વળતા સાસુ અને જમાઇના કમકમાટીભર્યા મોત થયા હતા.જે અંગે નંદેસરી પોલીસે ગુનો દાખલ કરી કાયદેસરની કાર્યવાહી હાથ ધરી છે.
આણંદ તાલુકાના રાજુપુરા ગામે રહેતા ઉમેદભાઇ કનુભાઇ પરમાર ( ઉં.વ.૪૬) ખેતી કામ કરે છે.તેમની મોટી દીકરીની સગાઇ પોઇચા ગામે નક્કી કરવાની હતી. જેથી, ઉમેદભાઇ અને તેમના પત્ની સુધાબેન ઘરેથી સવારે બાઇક લઇને નીકળ્યા હતા. ઉમેદભાઇના સાસુ મધુબેન ચીમનભાઇ ગામેચી, ઉં.વ.૬૨ (રહે.કાછલાપુરા ગામ, તા. વાસદ, જિ.આણંદ)ને પણ સાથે લઇ જવાના હતા. જેથી, તેમણે સાસુને વાસદ ટોલ પ્લાઝા પાસે આવી જવા કહ્યું હતું. સવા અગિયાર વાગ્યે સાસુને બાઇક પર બેસાડી તેઓ ત્રણેય જણા પોઇચા ગામે જતા હતા.
નેશનલ હાઇવે ૪૮ પર જ્યાં ભારતમાલા એક્સપ્રેસ હાઇવે મર્જ થાય છે. તે સ્થળ નજીકથી ઉમેદભાઇ બાઇક લઇને જતા હતા. તે દરમિયાન એક્સપ્રેસ હાઇવે પરથી ઉતરેલી ટ્રકે બાઇકને ટક્કર મારતા ઉમેદભાઇ, તેમના પત્ની સુધાબેન તથા સાસુ મધુબેન ફંગોળાઇને રોડ પર પટકાયા હતા. ટ્રકના તોતિંગ પૈંડા જમાઇ ઉમેદભાઇ તથા સાસુ મધુબેન પર ફરી વળતા તેઓ સ્થળ પર જ કચડાઇને મૃત્યુ પામ્યા હતા. અકસ્માત પછી ટ્રક ચાલક થોડે દૂર જઇને ઊભો રહી ગયો હતો. નંદેસરી પોલીસ સ્ટેશનના પી.એસ.આઇ. વી.કે. પાટિલે ટ્રકના ડ્રાઇવર અબઝૂર શાહુનખાન (રહે. ગામ ગુડ્ડી,તા.તાવુર, જિ.નૂર મેવાત, હરિયાણા) ની ધરપકડ કરી ટ્રક કબજે લીધી છે.
૫૦ ફૂટ સુધી બાઇકને ઢસડી જતો ટ્રકનો ડ્રાઇવર
વડોદરા,
ટ્રક ભારતમાલા એક્સપ્રેસ હાઇવેથી નીચે ઉતરી રહી હતી. તે દરમિયાન અકસ્માત થયો હતો. ટ્રક ડ્રાઇવરની પોલીસે પૂછપરછ કરતા તેણે જણાવ્યું હતું કે, મને બાઇક દેખાઇ જ નહતી. બાઇકને ટક્કર માર્યા પછી પણ ૫૦ ફૂટ દૂર સુધી ટ્રકચાલક ઢસડી ગયો હતો. ત્યારબાદ તેને અકસ્માતની જાણ થતા તેણે ટ્રક ઊભી કરી દીધી હતી.
