મેટોડા અને જેતપુરમાંથી ગાંજાના જથ્થા સાથે બે શખ્સો ઝડપાયા | Two people arrested with a quantity of ganja from Metoda and Jetpur
સુરત અને જૂનાગઢનું કનેક્શન ખુલ્યું
મેટોડાનો શખ્સ રિક્ષા અને રસનો ચિચોડો ચલાવવાની સાથે ગાંજાનો વેપલો પણ કરતો હતો
રાજકોટ: મેટોડા અને જેતપુરમાંથી પોલીસે ગાંજાનાં જથ્થા સાથે બે શખ્સોને ઝડપી લીધા હતા. બંને કેસમાં સુરત અને જૂનાગઢનાં કનેક્શન ખૂલતાં તે દિશામાં પોલીસે તપાસ આરંભી છે.
રાજકોટ રૂરલ એસઓજીએ બાતમીના આધારે કાલાવડથી મેટોડા જીઆઇડીસી તરફ જતા રસ્તા પરથી પસાર થયેલી રિક્ષામાંથી ૮૬૧ ગ્રામ ગાંજા સાથે હાબીલ બ્લોચ (ઉ.વ.૨૪, રહે. મેટોડા જીઆઇડીસી ગેઇટ નં.૨ની પાછળ)ને ઝડપી લીધો હતો. ગાંજાની કિંમત રૂા.૪૩ હજાર ગણી રિક્ષા અને બે મોબાઇલ ફોન સહિત કુલ રૂા.૨.૬૩ લાખનો મુદ્દામાલ કબ્જે કર્યો હતો.
પોલીસે જણાવ્યું કે, આરોપી હાબીલ મૂળ વિસાવદરનાં ખાંભાગીરનો વતની છે. તે રિક્ષા ચલાવવાની સાથે રસનો ચિચોડો પણ ચલાવે છે. તેની સાથે જ ગાંજાનો પણ વેપલો કરતો હતો. ગાંજાની છુટક પડીકી બનાવી વેંચાણ કરતો હોવાની બાતમીના આધારે તેને ઝડપી લેવાયો હતો. સુરતનાં રેલવે ટ્રેક પાસેથી અજાણ્યા શખ્સ પાસેથી ગાંજો લઇ આવતો હોવાનું રટણ કરી રહ્યો છે.
જ્યારે જેતપુર પોલીસે ધોરાજી રોડ પર વીરા શક્તિનગર સોસાયટીમાં રહેતા અરમાન નાઇ (ઉ.વ.૨૧)ને તેના ઘરમાંથી રૂા.૯૮૫૦ની કિંમતનાં ૧૯૭ ગ્રામ ગાંજા સાથે ઝડપી લીધો હતો. તેના મકાનમાંથી ગાંજો પેક કરવા માટેની ૨૪૦ કોથળીઓ, બે નાની-મોટી ચલમ, વજન કાંટો, મોબાઇલ ફોન સહિત કુલ રૂા.૧૯ હજારનો મુદ્દામાલ કબ્જે કર્યો હતો. પ્રાથમિક પુછપરછમાં જૂનાગઢથી ગાંજાનો જથ્થો લઇ આવ્યાનું રટણ કર્યું છે.
