ગુજરાતનો પહેલો કિસ્સો, ભાવનગર ડિસ્ટ્રિક્ટ બેન્કનું સર્વર હેક કરી 7 કરોડનું સાયબર ફ્રોડ | bhavnagar district bank server hack 7 crore cyber fraud gujarati news
Bhavnagar News : દર વર્ષે અબજો રૂપિયાના સાયબર ક્રાઈમ થાય છે તેમાં વ્યક્તિગત બેન્ક એકાઉન્ટ્સમાંથી રકમ તફડાવાય છે. પણ, ગુજરાતમાં પહેલી વખત કોઈ બેન્કનું સર્વર હેક કરી સાત કરોડ જેવી તોસ્તાન રકમ સેરવી લેવામાં આવી છે. ભાવનગર ડિસ્ટ્રિક્ટ કો-ઓપરેટીવ બેન્કનું સર્વર હેક કરીને રવિવારની રજાના દિવસે તળાજા, ભરતનગર, સુભાષનગર અને સિદસર એ ચાર બ્રાન્ચના બેન્ક એકાઉન્ટ્સમાં કુલ 350 ટ્રાન્ઝેકશન કરી કુલ 7 કરોડ રૂપિયા બીજા એકાઉન્ટ્સમાં ટ્રાન્સફર કરાયા હતા.
4 બ્રાન્ચના બેન્ક એકાઉન્ટ્સમાં 350 ટ્રાન્ઝેકશન કરી સાયબર ચીટીંગ
બે કરોડથી વધુ રકમના સાયબર ચીટીંગની ફરિયાદ સ્ટેટ સાયબર સેલમાં થતી હોવાથી ભાવનગર ડિસ્ટ્રિક્ટ બેન્કે ગાંધીનગર જઈ સ્ટેટ સેલમાં ફરિયાદ નોંધાવવા તજવીજ શરૂ કરી છે. સાયબર ગઠિયાઓએ ભાવનગર ડિસ્ટ્રિક્ટ કો-ઓપરેટીવ બેન્કના સોફ્ટવેર સિસ્ટમમાં પ્રવેશ મેળવી ચાર શાખાઓમાંથી અંદાજે રૂ. 7 કરોડની માતબર રકમ ટ્રાન્સફર કરી લીધાની ફરિયાદ નોંધી ગાંધીનગર સ્થિત સ્ટેટ સાયબર સેલ દ્વારા તપાસ હાથ ધરવામાં આવી છે.
બેંકની સિક્યુરિટી સિસ્ટમ હેક
તપાસમાં ઘટસ્ફોટ થયો છે કે, બેન્કની સોફ્ટવેર સિસ્ટમમાં મોબાઈલ એપ્લિકેશન દ્વારા પ્રવેશ મેળવવામાં આવ્યો હતો. બેન્કની ચાર શાખાઓની ડેટા સિક્યુરિટી હેક કરીને 350 બેન્ક ખાતાઓમાંથી રૂ. 7 કરોડની રકમ બિનઅધિકૃત ટ્રાન્ઝેકશન દ્વારા ટ્રાન્સફર થઈ હતી. મોબાઈલ દ્વારા વધુમાં વધુ રૂ. બે લાખ ટ્રાન્સફરની મર્યાદા હોય 350થી વધુ ટ્રાન્ઝેકશન વિવિધ બેન્કોમાં થયા હોવાનું સામે આવ્યું છે.
ચાર મોબાઈલ નંબર શંકાના દાયરામાં
ભાવનગર ડિસ્ટ્રિક્ટ કો. ઓ. બેન્કની તપાસમાં આ ફ્રોડ મોબાઈલ એપ્લિકેશનના માધ્યમથી થયું હોવાનું પ્રાથમિક તારણ સામે આવ્યું છે. સાતેક કરોડના સાયબર ફ્રોડમાં મોબાઈલ એપ્લિકેશન હોવાનું અને સાથો સાથ અલગ અલગ ચાર મોબાઈલનો ઉપયોગ થયો હોવાનું પણ સામે આવ્યું છે. ડિજિટલ ટ્રેલ પરથી જણાય છે કે આ ટ્રાન્ઝેકશન કરવા માટે ચાર મોબાઈલ ફોનનો ઉપયોગ થયો હતો.
બેન્કના ચેરમેને નોંધાવી ફરિયાદ
બેન્કના ચેરમેન રસિકભાઈ ભીંગરાડિયાએ જણાવ્યું કે ઘટનાની જાણ થતાં જ સત્તાવાળાઓને જાણ કરવામાં આવી હતી. બેન્કની 88 શાખાઓ અને એક હેડ ઓફિસ છે અને અંદાજે સાત લાખ ખાતાધારકો છે. ખાતાધારકોને ચિંતા કરવાની જરૂર નથી કારણ કે તેમની થાપણ પર કોઈ અસર નહીં પડે. હાલમાં બેન્કે અન્ય ટ્રાન્ઝેકશન બંધ કરી દીધા છે. હેકિંગ પછી જે બેંકિંગ કામગીરી બંધ કરાઈ છે તે બુધવારથી ફરી શરૂ થવાની શક્યતા વ્યક્ત કરાઈ છે.
