12 પાસ બાંગ્લાદેશી યુવકે ડેડ ઈ-મેઈલ હેક કરી બોમ્બની ધમકીઓ આપી, અમદાવાદ પોલીસે ટ્રિકથી ટ્રેપ કર્યો | Ahmedabad News bomb threat via email interrogation accused Dead email USDT Transaction
Ahmedabad News: અમદાવાદની શાળાઓ અને નીચલી અદાલતોને છેલ્લા એક વર્ષથી બોમ્બ બ્લાસ્ટ અને અન્ય ધમકીભર્યા ઈ-મેઈલ મોકલી ફાળકો ફેલાવનાર મુખ્ય સૂત્રધારને અમદાવાદ સાયબર ક્રાઈમ અને શહેર ક્રાઈમ બ્રાન્ચે સંયુક્ત ઓપરેશન હાથ ધરી પશ્ચિમ બંગાળથી ઝડપી પાડ્યો છે. ઝડપાયેલો આરોપી મૂળ બાંગ્લાદેશના ઢાકાનો રહેવાસી છે, જેનું નામ માઈકલ બિશ્વાસ છે પરંતુ તે ભારતમાં સૌરભ બિશ્વાસના નામે ગેરકાયદેસર રીતે રહેતો હતો. આરોપી VPN અને પ્રોક્સી IP એડ્રેસનો ઉપયોગ કરીને પોતાની ઓળખ છુપાવી રહ્યો હતો. પોલીસે આ મામલે સાયબર ટેરરિઝમની કલમો હેઠળ ગુનો નોંધી આરોપીના 10 દિવસના રિમાન્ડ મેળવી વધુ તપાસ હાથ ધરી છે.
આરોપીની બહેન પણ સંડોવાયેલી
તપાસમાં ખુલાસો થયો છે કે માત્ર 12 પાસ હોવા છતાં આરોપી સોશિયલ મીડિયા અને યુટ્યુબ દ્વારા સાયબર ક્રાઈમની ટેકનિકો શીખ્યો હતો. તે જૂના અને ડેડ ઈ-મેઈલ આઈડી હેક કરી તેના પાસવર્ડ બદલીને અન્ય દેશોના સંગઠનોને વેચતો હતો. પોલીસ એક્સપર્ટે ગ્રાહક બનીને આરોપીનો સંપર્ક કર્યો અને USDTમાં નાણાં ચૂકવીને તેને ટ્રેપમાં ફસાવ્યો હતો. આરોપીએ અત્યાર સુધીમાં 250થી વધુ આઈડી વેચ્યા હોવાનું કબૂલ્યું છે, જેમાં ખાલિસ્તાની મોડ્યુલ અને ચેન્નાઈ મોડ્યુલના લખાણો પણ સામે આવ્યા છે. આ રેકેટમાં તેની બહેન પણ સંડોવાયેલી હોવાની પ્રાથમિક વિગતો મળી છે. અમદાવાદ ઉપરાંત મુંબઈ, દિલ્હી, પંજાબ અને મહારાષ્ટ્ર જેવા રાજ્યોમાં પણ તેણે ધમકીઓ આપી હોવાથી હવે કેન્દ્રીય એજન્સીઓ અને અન્ય રાજ્યોની પોલીસ પણ તેની પૂછપરછ કરવા અમદાવાદ આવશે.
કોર્ટે 10 દિવસના રિમાન્ડ મંજૂર કર્યા
અમદાવાદ ક્રાઈમ બ્રાન્ચના JCPએ જણાવ્યું કે, છેલ્લા એક વર્ષથી શાળાઓ, એરપોર્ટ અને કોર્ટ સંકુલમાં બોમ્બની ધમકી આપતા અલગ-અલગ ઈમેઈલ આઈડીથી મેસેજ મળતા હતા. આ તપાસમાં અમારી ટીમે બાંગ્લાદેશના ઢાકાના મૂળ વતની માઈકલ વિશ્વાસ.જે ભારતમાં સૌરભ વિશ્વાસ તરીકે રહેતો હતો. તેને પશ્ચિમ બંગાળની સરહદ પાસેથી ઝડપી પાડ્યો છે. આ આરોપી છેલ્લા પાંચ-છ વર્ષથી ભારતમાં રહેતો હતો અને તેની સાથે તેની બહેનની સંડોવણી પણ જણાઈ રહી છે. અમે તેને કોર્ટમાં રજૂ કરીને 10 દિવસના રિમાન્ડ મેળવ્યા છે જેથી આ આખા નેટવર્કની ઊંડી તપાસ કરી શકાય.
વણવપરાયેલી ઈમેઈલ આઈડી હેક કરતા
‘આ આરોપીની કામ કરવાની પદ્ધતિ એવી હતી કે તેઓ જૂના કે વપરાશમાં ન હોય તેવા ઈમેઈલ આઈડી હેક કરતા અને તેના રિકવરી આઈડી તથા પાસવર્ડ બદલી નાખતા હતા. ત્યારબાદ આ તૈયાર કરેલા આઈડી તેઓ વિદેશમાં બેઠેલા હેન્ડલર્સને USDT એટલે કે ક્રિપ્ટોકરન્સીના બદલામાં વેચતા હતા. આ આઈડીનો ઉપયોગ કરીને અમદાવાદની શાળાઓ, એરપોર્ટ અને જિલ્લા કોર્ટ ઉપરાંત મહારાષ્ટ્ર, દિલ્હી, પંજાબ અને બંગાળ જેવા રાજ્યોમાં ધમકીભર્યા મેઈલ મોકલવામાં આવતા હતા. તેઓ પોતાની ઓળખ છુપાવવા માટે VPN અને પ્રોક્સી આઈપીનો ઉપયોગ કરતા હતા, જેના કારણે તેમને ટ્રેક કરવા ખૂબ જ મુશ્કેલ હતા.’
‘અમારી સાયબર અને ક્રાઈમ બ્રાન્ચની ટીમે આ કેસ ઉકેલવા માટે પોતે ગ્રાહક બનીને તેમની સાથે USDTમાં ટ્રાન્ઝેક્શન કર્યું અને ટેકનિકલ એનાલિસિસ દ્વારા રિકવરી આઈડી મેચ કરીને આરોપી સુધી પહોંચવામાં સફળતા મેળવી છે. અત્યાર સુધીમાં અમને 250થી વધુ ઈમેઈલ આઈડીની વિગતો મળી છે, જેમાંથી 50થી 60 આઈડીનો ઉપયોગ ધમકી આપવા માટે થયો હોવાનું જણાય છે. અમે આ મામલે IT એક્ટની કલમ 66F હેઠળ સાયબર ટેરરિઝમનો ગુનો દાખલ કર્યો છે. આ એક વ્યવસ્થિત સંગઠિત ગુનાખોરી છે અને અમે તેના મુખ્ય હેન્ડલર્સ સુધી પહોંચવા માટે અન્ય દેશોની એજન્સીઓ સાથે પણ સંપર્કમાં છીએ.’
