અધર્મ પર ધર્મનો વિજય : ખેડા જિલ્લામાં 1200 થી વધુ સ્થળોએ હોળીનું પ્રાગટય | Victory of religion over unrighteousness: Holi celebrated in more than 1200 places in Kheda district
– હોળીના પર્વની જિલ્લામાં હર્ષોલ્લાસ સાથે ઉજવણી
– જિલ્લામાં કાયદો અને વ્યવસ્થા જળવાય તે હેતુથી પોલીસ બંદોબસ્તનું આયોજન પણ કરવામાં આવ્યું
નડિયાદ : અધર્મ પર ધર્મના પર્વની ઉજવણી સમાન હોળીના પર્વના દિવસે ખેડા જિલ્લામાં હર્ષોલ્લાસ સાથે ઉજવણી કરાઈ, જિલ્લાના ગામેગામ સંધ્યાટાણે હોળીનું પ્રાગટય કરાયું હતું. જિલ્લામાં કુલ મળી ૧૨૦૦ ઉપરાંત સ્થળોએ હોળીના પ્રાગટય સાથે હોળિકા દહનનું પર્વ ઉજવાયું. જેમાં હજારો મણ લાકડાં તથા છાણા જેવી વસ્તુઓનું દહન કરવામાં આવ્યું હતું.
જિલ્લાના ગામેગામ વિવિધ પોળ, મહોલ્લા અને સોસાયટીના માર્ગો જેવા વિવિધ સ્થળોએ હોળી પ્રગટાવવામાં આવી હતી. હોળી માટે ભેગા કરેલા લાકડાને પિરામીડ આકારમાં ગોઠવવામાં આવ્યા હતા. તેના પર છાણાં તેમજ દહન થતી અન્ય વસ્તુઓ પધરાવવામાં આવી હતી. ખેડા જિલ્લામાં આ વર્ષે ૧૨૦૦ કરતા પણ વધુ સ્થળોએ હોળીનું પ્રાગટય કરવામાં આવ્યું હતું. આ માટે હજારો મણ લાકડાનો વપરાશ થયો હતો. હોળી પ્રાગટયના સ્થળોએ છેલ્લા બે અઠવાડિયાથી લાકડાનો ઢગલો કરવામાં આવી રહ્યો હતો. ઢોલ-નગારાના નાદ વચ્ચે પૂજન કરી પ્રાગટય કરાયું. આ પ્રસંગે હોળી માતાનો જયજયકાર કરવામાં આવ્યો હતો. હોળીના પ્રસંગ નિમિત્તે ખેડા જિલ્લામાં કાયદો અને વ્યવસ્થા જળવાય તે હેતુથી વિશેષ પોલીસ બંદોબસ્તનું આયોજન કરવામાં આવ્યું છે.
નડિયાદ શહેરમાં 150 કરતા વધુ સ્થળોએ હોળી દહન
ખેડા જિલ્લાના મુખ્ય મથક નડિયાદ શહેરની વિવિધ પોળ, મહોલ્લા તથા સોસાયટી વિસ્તારોમાં મળી આશરે ૧૫૦ કરતા પણ વધુ જગ્યાઓએ હોળીનું પ્રાગટય કરાયું હતું. જેમાં પીજ ભાગોળ, ચકલાસી ભાગોળ, વીકેવી રોડ, ખેતા તળાવ પાસે, દેસાઈ સંસ્કાર કેન્દ્ર પાસે, ખારાકૂવા, બારકોશીયા રોડ, અમદાવાદી બજાર વિસ્તાર, વાણિયાવડ વિસ્તાર, કોલેજ રોડ, સિવિલ રોડ, પેટલાદ ફાટક રોડ, મિલ રોડ, જવાહર નગર સહિત પશ્ચિમ વિસ્તારમાં પવનચક્કી, પીજ રોડ, વલ્લભનગર, માઈમંદિર રોડ તથા આઈજી માર્ગ તથા વૈશાલી રોડ સહિત અન્ય વિસ્તારનો સમાવેશ થાય છે. છેલ્લા બે અઠવાડિયાથી ઉપરોક્ત જગ્યાઓએ લાકડા ભેગા કરવાની કામગીરી સ્થાનિક રહીશો દ્વારા કરવામાં આવી રહી હતી.
