સુકો શનિવાર બાદ રિવર્સ બ્લીંકીટ, સુરત પાલિકાને પ્લાસ્ટિક આપો નાણાં મેળવો યોજના માટે વિચારણા | Consideration for a scheme to give plastic to Surat Municipality and get money
Surat Corporation : સુરત મ્યુનિ. તંત્ર સફાઈમાં અગ્રેસર રહેવા સાથે સુરતીઓને સૂકા ભીના કચરાની ટેવ પડે તે માટે મ્યુનિ. તંત્રએ પાંચ ઝોનમાં સુકો શનિવાર અભિયાન શરૂ કર્યું છે. જેમાં અઠવાડિયામાં શનિવાર સિવાયના બાકી દિવસ ભીનો કચરો અને શનિવારે સૂકો કચરો-પ્લાસ્ટિક વેસ્ટ અલાયદો કરવામાં આવશે. આ અભિયાન પાલિકાએ પાંચ ઝોનમાં શરુ કર્યું છે. આ ઉપરાંત સુકો શનિવાર તમામ ઝોનમાં લાગુ થશે અને તેમાં સફળતા મળે તો ભવિષ્યમાં સુરતીઓને પ્લાસ્ટિક વેસ્ટના બદલામાં નાણાં આપવામાં આવે તેવી ‘રિવર્સ બ્લીંકીટ’ માટે વિચારણા પાલિકા કરી રહી છે.
સુરત મ્યુનિ. કમિશ્નર એમ.નાગરાજને સુરતને સ્વચ્છતા સર્વેક્ષણ લીગમાં અગ્રેસર રાખવા માટે પહેલા દિવસથી જ કામગીરી શરૂ કરી દીધી છે. પાલિકાના ઝોનમાં વહેલી સવારે ફિલ્ડમાં જઈ સફાઈનું નિરીક્ષણ કરી રહ્યાં છે. લોકોમાં સુકો અને ભીનો કચરો અલગ થાય તથા પ્લાસ્ટિક કચરો અલગ આપે તે માટે સુકો શનિવાર અભિયાન શરૂ કર્યું છે. પાયલોટ પ્રોજેક્ટ તરીકે રાંદેર, લિંબાયત, અઠવા, સરથાણા અને કતારગામ ઝોનમાં અભિયાન શરૂ કર્યું હતું. જેમાં પહેલા જ શનિવારે 1500 કિલો પ્લાસ્ટિક વેસ્ટ ભેગો કરીને રીસાયકલિંગ પ્લાન્ટમાં મોકલી આપ્યું હતું.
આ અંગે મ્યુનિ. કમિશ્નર એમ.નાગરાજને કહ્યું હતું કે, સપ્તાહમાં રોજ લોકો ભીનો કચરો આપે અને એક દિવસ શનિવારે સૂકો કચરો જેમાં પ્લાસ્ટીક વેસ્ટ આપે તે અભિયાન શરૂ કર્યું છે. જેના કારણે પર્યાવરણ માટે ખતરો એવા પ્લાસ્ટીકને અન્ય કચરાથી અલગ કરી શકાય છે. તબક્કાવાર તમામ ઝોનમાં સુકો શનિવાર અભિયાન ચલાવાશે.
આ અભિયાન સફળ થયા પછી સુરતીઓ પર્યાવરણ માટે સૌથી મોટો ખતરો ગણાતો પ્લાસ્ટિક વેસ્ટના બદલામાં નક્કી કરેલા નાણાં મેળવી શકે તેવી રિવર્સ બ્લીંકીટ યોજના અમલમાં મુકવા વિચારણા થઈ રહી છે. આ યોજના હેઠળ નાગરિકો દ્વારા આપવામાં આવેલા પ્લાસ્ટિક વેસ્ટના વજન મુજબ નક્કી રૂપિયાનો લાભ આપવામાં આવે તેવું આયોજન થશે. જેના કારણે પરિણામે લોકો કચરો રસ્તા, ગટર કે ખાલી પ્લોટ માં ફેંકવાના બદલે સુકો શનિવારે અભિયાનમાં એક સાથે પ્લાસ્ટીક વેસ્ટ આપવા માટે પ્રેરાશે.
જો મ્યુનિ. કમિશ્નર એમ.નાગરાજન આ રિવર્સ બ્લીંકીટ યોજનાની શરૂઆત કરે તો સુરત ગુજરાત માટે પ્લાસ્ટીક વેસ્ટ નિકાલ માટે મોડલ બની શકે છે. આ ઉપરાંત પ્લાસ્ટિક જે અત્યાર સુધી શહેર માટે માથાનો દુખાવો બન્યો હતો તે હવે યોગ્ય આયોજનથી કમાણી અને પર્યાવરણ રક્ષણ બંનેનું સાધન બની શકે છે. સ્વચ્છતા માત્ર તંત્રની જવાબદારી નથી પરંતુ નાગરિકોની સક્રિય ભાગીદારી થી જ સફળ બની શકે તેવી વિચારણા થઈ રહી છે.
