ચેક બાઉન્સ કેસમાં 3 શખ્સને કોર્ટે સજા ફટકારી | Court sentences 3 people in cheque bounce case
– જુદી-જુદી 3 ફરિયાદમાં ભાવનગર કોર્ટનો ચુકાદો
– મહુવા, નીચા કોટડા અને નવાગામના શખ્સોને ચેકની રકમ કોર્ટમાં જમા કરાવવા હુકમ
ભાવનગર : ફાયનાન્સ કંપનીમાંથી વાહન ઉપર લોન લીધા બાદ આપેલા ચેકો બાઉન્સ થયા અંગેની જુદી-જુદી ત્રણ ફરિયાદમાં ભાવનગર કોર્ટે મહુવા, નીચા કોટડા અને નવાગામ (કનીવાવ)ના ત્રણ શખ્સોને સાદી કેદની સજા અને ચેકની રકમ કોર્ટમાં જમા કરાવવા હુકમ કર્યોછે.
મહુવાના ઈન્દીરાનગર, મસ્જિદવાળા ખાંચામાં રહેતો અનવર અબ્દુલભાઈ ગાહા નામના શખ્સે શ્રીરામ ટ્રાન્સપોર્ટ ફાયનાન્સ કંપની લિ. (શ્રીરામ ફાયનાન્સ લિ.)માંથી વાહન ઉપર લોન લીધા બાદ લોન નિયમિત ભરપાઈ નહીં કરી બાકી રકમ પેટે રૂા.૧.૩૦ લાખનો ચેક આપ્યો હતો. જે ચેક બાઉન્સ થતાં કંપનીએ તેમના વકીલ પી.બી. મકવાણા મારફત ભાવનગરના બીજા એડી. ચીફ જ્યુડી. મેજિ.ની કોર્ટમાં ફરિયાદ દાખલ કરતા આરોપી અનવર ગાહાને તકસીરવાન ઠેરવી છ માસ સાદી કેદની સજા, નવ ટકા વ્યાજ સાથે ચેકની રકમ કોર્ટમાં દંડ પેટે જમા કરાવવા હુકમ કરાયો છે. તેમજ મહુવાના નીચા કોટડા ગામે ૫૫-૧, પ્લોટ એરિયામાં રહેતો ભરત જીણાભાઈ ભાલિયા સામે શ્રીરામ ફાયનાન્સ દ્વારા વકીલ હિતેષભાઈ એમ. કુકડિયા મારફત રૂા.૭.૮૪ લાખના ચેક બાઉન્સ અંગે કરાયેલી ફરિયાદમાં ભાવનગરના બીજા એડી. ચીફ જ્યુડી. મેજિ. જે.પી. પ્રજાપતિએ શખ્સને છ માસની સજા, ચેકની રકમ કોર્ટમાં દંડ પેટે જમા કરાવવા ફરમાન કર્યું છે. ત્રીજા કેસમાં સિહોરના નવાગામ (કનીવાવ) ગામે રહેતો જીતેન્દ્ર જયમલભાઈ ડોડિયા નામના શખ્સ સામે શ્રીરામ ફાયનાન્સ લિ.એ તેમના વકીલ પી.બી. મકવાણા મારફત એન.આઈ. એક્ટની કલમ ૧૩૮ હેઠળ નોંધાવેલી ફરિયાદમાં ભાવનગરના બીજા એડી. ચીફ જ્યુડી. મેજિ.એ જીતેન્દ્ર ડોડિયાને તકસીરવાન ઠેરવી એક માસ કેદની સજા અને ચેકની રકમ કોર્ટમાં જમા કરાવવા હુકમ કર્યો છે.
