અમદાવાદ: CAની ઓફિસમાં નોકરી કરતો શખસ સાંજે ‘નકલી પોલીસ’ બની જતો, બોડકદેવ પોલીસે ઝડપી પાડ્યો | Ahmedabad: Fake Cop Held by Bodakdev Police Posed as Traffic Officer
Fake Police In Ahmedabad: અમદાવાદમાં ટ્રાફિક પોલીસનો રોફ જમાવી વાહનચાલકોને અટકાવી દસ્તાવેજોની તપાસ કરતા એક નકલી પોલીસનો પર્દાફાશ થયો છે. બોડકદેવ પોલીસ સ્ટેશન દ્વારા ભરત સેનવા નામના શખસની ધરપકડ કરવામાં આવી છે, જે પોલીસ અધિકારી હોવાનો ઢોંગ કરી નાગરિકોને પરેશાન કરતો હતો.
કેવી રીતે ફૂટ્યો ભાંડો?
મળતી માહિતી અનુસાર, એન ડિવિઝન ટ્રાફિક પોલીસના કર્મચારીઓ હેબતપુર ચાર રસ્તા નજીક ફરજ પર હતા. આ દરમિયાન ટ્રાફિક ઓછો હોવાથી કોન્સ્ટેબલ અને TRB જવાનો રસ્તાની બાજુમાં ઊભા હતા. ત્યારે તેમની નજર એક શખસ પર પડી જેણે ખાખી પેન્ટ અને પોલીસ જેવા જ બૂટ પહેરેલા હતા. તે આવતા-જતા વાહનચાલકોને રોકીને તેમની પાસેથી ડ્રાઇવિંગ લાઇસન્સ અને ગાડીના કાગળો માંગતો હતો. તેનું વર્તન શંકાસ્પદ લાગતા અસલી ટ્રાફિક પોલીસે તેની પાસે જઈને આઈકાર્ડ માંગ્યું, પરંતુ તે કોઈ પણ સત્તાવાર દસ્તાવેજ રજૂ કરી શક્યો નહીં.
દિવસ દરમિયાન CAની ઓફિસમાં નોકરી, સાંજે પોલીસનો વેશ
પોલીસની પ્રાથમિક પૂછપરછમાં જે વિગતો સામે આવી છે તે ચોંકાવનારી છે. આરોપીનું નામ ભરત સેનવા છે અને તે વિજાપુર તાલુકાનો વતની છે. તે છેલ્લા 13 વર્ષથી અમદાવાદના પ્રહલાદનગર વિસ્તારમાં એક ચાર્ટર્ડ એકાઉન્ટન્ટ (CA)ની ઓફિસમાં નોકરી કરે છે. તે દરરોજ સવારે રિક્ષામાં વડાસનથી અમદાવાદ નોકરીએ આવતો હતો. ઓફિસનો સમય (10 થી 6) પૂરો થયા પછી તે ખાખી પોશાક પહેરીને રસ્તા પર ઉભો રહી જતો હતો અને પોલીસ હોવાની છાપ ઉભી કરી વાહનચાલકોને રોકતો હતો.
એન ડિવિઝન ટ્રાફિક કોન્સ્ટેબલની ફરિયાદના આધારે બોડકદેવ પોલીસે ગુનો નોંધી આરોપીની ધરપકડ કરી છે. પોલીસ હવે એ દિશામાં તપાસ કરી રહી છે કે આરોપીએ અત્યાર સુધીમાં કેટલા વાહનચાલકોને રોક્યા છે અને શું તેણે કોઈની પાસેથી ડરાવી-ધમકાવીને પૈસા પડાવ્યા છે? શું આ માત્ર સત્તા દર્શાવવાનો શોખ હતો કે પછી આર્થિક ઉઘરાણીનું મોટું કૌભાંડ?
