આણંદ નજીકના એક્ઝિટ પોઇન્ટ પાસે કન્ટેનરમાં આગ ભભૂકતા અફડાતફડી | Panic as container catches fire near exit point near Anand
– અમદાવાદ-વડોદરા એક્સપ્રેસ હાઈવે પર
– કન્ટેનર મુંબઈથી દિલ્હી જવા નીકળ્યું હતું, 25 હજાર લિટર પાણીના મારા બાદ આગ પર કાબૂ મેળવાયો
આણંદ: અમદાવાદ-વડોદરા એક્સપ્રેસ હાઈવે પર આવેલા આણંદ નજીકના એક્ઝિટ પોઇન્ટ પાસે બુધવારની રાત્રિના એક કન્ટેનર ટ્રકમાં અચાનક આગ ફાટી નીકળતા અફડાતફડી મચી હતી. આ અંગે આણંદ ફાયર બ્રિગેડને જાણ થતા ફાયર બ્રિગેડની ટીમ ઘટનાસ્થળે દોડી ગઈ હતી અને લગભગ ચાર કલાકની ભારે જહેમત બાદ આગ ઉપર કાબૂ મેળવ્યો હતો. જોકે આગના કારણે કન્ટેનરમાં ભરેલો માલસામાન બળીને ખાખ થઈ ગયો હતો.
મુંબઈથી એક કન્ટેનર ટ્રક બેડશીટનું મટિરીયલ અને પુસ્તકો ભરીને દિલ્હી જવા નીકળ્યું હતું. બુધવારની રાત્રિના આ કન્ટેનર ટ્રક અમદાવાદ-વડોદરા એક્સપ્રેસ હાઈવે ઉપર આવેલા આણંદ નજીકના ભાલેજ તરફ જવાના એક્ઝિટ પોઇન્ટ નજીકથી પસાર થઈ રહ્યું હતું.
ત્યારે અચાનક ટ્રકની કેબિનમાં આગ ભભૂકી ઉઠી હતી. જેથી ટ્રક ચાલકે સમય સૂચકતા વાપરી ટ્રકને રોડની સાઈડમાં સંભળાવી દીધું હતું અને કેબિનમાંથી બહાર નીકળી આણંદ ફાયર બ્રિગેડને જાણ કરી હતી.
થોડી જ મિનિટોમાં આગે વિકરાળ સ્વરૂપ ધારણ કર્યું હતું અને કન્ટેનરના પાછળના ભાગ સુધી આગ ફેલાતા અંદર ભરેલો માલ સામાન સળગવા લાગ્યો હતો. આણંદ ફાયર બ્રિગેડ વિભાગની બે ગાડીઓ ઘટનાસ્થળે દોડી ગઈ હતી અને પાણીનો મારો ચલાવી આગ ઉપર કાબૂ મેળવવા નો પ્રયાસ કર્યો હતો. જો કે બંધ બોડીના કન્ટેનરને ખોલવા માટે જેસીબી મશીનની મદદ લેવામાં આવી હતી. કન્ટેનર ખોલ્યા બાદ આગ ઉપર કાબૂ મેળવી શકાયો હતો.
જો કે આગના કારણે કન્ટેનરમાં ભરેલો માલસામાન સળગીને ખાખ થઈ ગયો હતો. લગભગ ચાર કલાક સુધી આશરે ૨૫ હજાર લિટર પાણીનો મારો ચલાવ્યા બાદ આગ ઉપર કાબૂ મેળવવામાં સફળતા મળી હતી.
