ડ્રેનેજની ચેમ્બરમાં ઉતરેલા શ્રમજીવી અને મેનેજરના મોત અંગે ગુનો દાખલ | Case registered in connection with death of worker and manager who fell into drainage chamber
વડોદરા,અણખોલ ગામ નજીકના ખટંબા ગામે હિમાલયા પાર્ટી પ્લોટના પાર્કિંગમાં ડ્રેનેજ લાઇનની કામગીરી દરમિયાન ચેમ્બરમાં ઉતરેલા શ્રમજીવી અને પ્રોજેક્ટ મેનેજરના મોત અંગે કોન્ટ્રાક્ટ લેનાર કંપની તથા પેટા કોન્ટ્રાક્ટ લેનાર કંપનીના પ્રોપરાઇટર સામે વરણામા પોલીસે સાપરાધ મનુષ્ય વધનો ગુનો દાખલ કર્યો છે.
ટી.પી. સ્કીમ ૨૫ (હનુમાનપુરા, અણખોલ, બાપોદ, ખટંબા) ખાતે આવેલા ૧૮ મીટરના રોડ પર ડ્રેનેજ લાઇનની કામગીરી કરવા માટે ડ્રાફ્ટ એગ્રીમેન્ટથી કન્સટ્રક્શન અંગેનો કોન્ટ્રાક્ટ વુડા પાસેથી જ્યંતિસુપર કન્સટ્રક્શન પ્રા.લિ. ના પ્રોપરાઇટર જ્યંતિ અંબાલાલ પટેલે નવેમ્બર ૨૦૧૧ માં લીધો હતો. એગ્રીમેન્ટમાં કરેલી શરતોનો ભંગ કરીને ગ્રીસ્વા ઇન્ફ્રા પ્રોજેક્ટ એલ.એલ.પી., અમદાવાદના પ્રોપરાઇટર સંજય માધવભાઇ ખૂંટને પેટા કોન્ટ્રાક્ટ આપ્યો હતો. કોન્ટ્રાક્ટર જાણતા હતા કે, ડ્રેનેજની ચેમ્બરમાં સાફ સફાઇ કરવા માટે સલામતીના સાધનો વિના ગટરમાં ઉતરી કામ કરવામાં આવે તો ગેસ ગળતર થવાથી શ્રમજીવીનું મોત થઇ શકે છે. તેમછતાંય અક્ષય શનાભાઇ ભાભોર તથા પ્રોજેક્ટ મેનેજર વિપુલ મનસુખભાઇ માંગરોલીયા ને ગત ૧૩ મી તારીખે બપોરે સલામતીના સાધનો પૂરા પાડયા વગર ડ્રેનેજની સાફ સફાઇ કરી કન્સટ્રક્શનનું કામ સોંપ્યું હતું. જેના કારણે ચેમ્બરમાં ઉતરેલા બંનેના મોત થયા હતા. વિપુલની અંતિમવિધિ કર્યા પછી તેના પિતરાઇ ભાઇએ વરણામા પોલીસ સ્ટેશનમાં ફરિયાદ નોંધાવી છે.
