વડોદરામાં તાંદલજા-સહકાર નગરના ઝુંપડા તોડ્યાને આઠ વર્ષ થયા છતાં મકાન મળ્યા નહીં : 18 મહિનાથી ભાડું ચૂકવવાનું બંધ, ઝૂંપડા વાસીઓનો હોબાળો | slum dwellers are in an uproar after demolition of huts at Tandalja Sahakar Nagar in Vadodara
Vadodara : વડોદરા શહેરના પશ્ચિમ વિસ્તારમાં તાંદલજાની સહકાર નગરના 1428 મકાનોનું ડિમોલિશન 2017માં કરાયું હતું. મામલો હાઇકોર્ટમાં પહોંચતા 2026 સુધીમાં જે તે જગ્યાએ સહકાર નગરનું પુનઃ નિર્માણ કરીને લાભાર્થીઓને મકાન ફાળવી આપવાના હુકમ સામે પાલિકા તંત્ર દ્વારા આ 60 હજાર સ્કે.ફીટ જમીન કોન્ટ્રાક્ટરને વેચી દેવાના આક્ષેપો સાથે સ્થાનિક રહીશો સહિત યુવાનોએ વિરોધ કરી 18 મહિનાના બાકી ભાડાની માંગ સાથે ડિમોલિસ કરાયેલા સહકાર નગરનું પુન: નિર્માણ કરી લાભાર્થીઓને તાત્કાલિક ધોરણે મકાન ફાળવી આપવા આક્રોશ સાથે દેખાવો યોજ્યા હતા.
શહેરના પશ્ચિમ વિસ્તાર તાંદલજામાં આવેલા સહકાર નગરના 1428 મકાનોનું ડિમોલિશન 2017માં પાલિકા તંત્ર દ્વારા કરવામાં આવ્યું હતું ત્યારે તમામ મકાન માલિકોને પ્રતિમાસ રૂપિયા 2000 ભાડુ આપવાનું નક્કી થયું હતું. બે વર્ષ સુધી રેગ્યુલર મળ્યા બાદ હવે મળવાનું બંધ થયું હોવાનો સ્થાનિકોએ આક્ષેપ કર્યો છે. તાત્કાલિક ધોરણે મકાનો ફાળવવાની ખાતરી છતાં આવાસ નહીં મળતા લાભાર્થીઓ હાઇકોર્ટમાં પહોંચ્યા હતા. જ્યાં ત્રણ વર્ષ બાદ સહકાર નગરના પુનઃનિર્માણનો આદેશ થયો હતો. આમ છતાં પણ લાભાર્થીઓને હજી સુધી મકાનો મળ્યા નથી.
જ્યારે બીજી બાજુ સહકાર નગરની 60 હજાર સ્ક્વેર ફીટ જમીન પાલિકા તંત્ર દ્વારા કોઇક કોન્ટ્રાક્ટરને વેચાણ આપ્યાની જાણ સ્થાનિકોને થઈ હોવાથી આક્રોશ ફેલાયો હતો. હવે બાકી નીકળતા 18-20 મહિનાના ભાડા કોણ ચૂકવશે બિલ્ડર કે પાલિકા તંત્ર? એ બાબતે સ્થાનિક યુવાઓ રોષે ભરાયા હતા. જોકે મકાનો મળે એ અંગે સ્થાનિકો કલેક્ટર કચેરી સહિત બાલિકા તંત્રમાં વારંવાર ધક્કા ખાઈ રહ્યા હતા. હવે જ્યારે 60 હજાર સ્ક્વેર ફીટ જમીન વેચાઈ જતા સાફ-સફાઈ શરૂ કરવામાં આવી હતી.
જ્યારે બીજી બાજુ નજીકમાં અન્ય ખુલ્લી જગ્યામાં 60 ટકા જેટલું બાંધકામ થયું છે પરંતુ હજી બાકી બાંધકામ સત્વરે પૂરું કરવા સહિત સ્થાનિકોની માંગ છે કે, અમને તાત્કાલિક ધોરણે બાકીનું ભાડું ચૂકવી આપવા તંત્રને જણાવ્યું હતું. માત્ર રૂપિયા 2000ના ભાડા સામે પ્રત્યેક લાભાર્થી રૂપિયા 6થી 7 હજાર જેટલું ભાડું ભરે છે. છતાં પણ 11 મહિના બાદ એગ્રીમેન્ટ મુજબ મકાન બદલીને લાભાર્થીઓ કંટાળી ગયા હોવાથી વિફરેલા સ્થાનિકો અને યુવાનોએ તાત્કાલિક ધોરણે બાકી નાણાની ચુકવણી થાય અને પ્રત્યેક લાભાર્થીને તાત્કાલિક ધોરણે મકાન ફાળવણી કરવામાં આવે તેવી આક્રોશ સાથે માંગ કરીને તંત્ર વિરુદ્ધ હલ્લાબોલ કર્યો હતો.
