15 ફેબ્રુઆરીએ BCAમાં સત્તા માટે જંગ : સત્યમેવ જયતે–રોયલ ગઠબંધન સામે રિવાઇવલ31 | Battle for power in BCA on February 15: Satyamev Jayate Royal alliance against Revival31
Baroda Cricket Association : બરોડા ક્રિકેટ એસોસિએશન (BCA)ની 15 ફેબ્રુઆરીએ યોજાનારી ચૂંટણીને લઈને ક્રિકેટ વર્તુળોમાં ભારે ચકચાર છે. સત્યમેવ જયતે અને રોયલ ગ્રુપ ગઠબંધન કરીને મેદાનમાં ઉતર્યા છે, જ્યારે સામા પક્ષે રિવાઇવલ31 ગ્રુપ ટક્કર આપી રહ્યો છે. જાહેર સભાઓથી લઈને બંધ બારણે બેઠકો સુધી પ્રચારનો દોર તેજ બન્યો છે. આક્ષેપ-પ્રતિઆક્ષેપ વચ્ચે ક્રિકેટના સર્વાંગી વિકાસના વચનો આપવામાં આવી રહ્યા છે.
સત્યમેવ અને રોયલ જૂથ તરફથી નવા સ્ટેડિયમ પ્રોજેક્ટ અંગે ગંભીર પ્રશ્નો ઉઠી રહ્યા છે. આશરે રૂ.100 કરોડના અંદાજ સામે ખર્ચ વધીને લગભગ રૂ.360 કરોડ પહોંચ્યો હોવાનું જણાવાય છે. સાથે જ નિર્માણ પૂર્ણ થવામાં લગભગ આઠ વર્ષ લાગ્યા હોવાની ચર્ચા છે. સભ્યો પૂછે છે કે, યોગ્ય આયોજન અને દેખરેખથી વિલંબ ટાળી શકાય તેમ ન હતું? ટેન્ડર પ્રક્રિયા, ખર્ચની વિગત અને ઓડિટ રિપોર્ટ જાહેર કરવાની માંગ ઉઠી રહી છે.
ઉપરાંત વિજય હઝારે, ઇરફાન-યુસુફ પઠાણ અને હાર્દિક પંડ્યા જેવા ખેલાડીઓ આપનાર બરોડા ક્રિકેટનું ગૌરવ અખંડ છે. છતાં છેલ્લા વર્ષોમાં સિનિયર ટીમો સતત નોકઆઉટ તબક્કે પહોંચી શકી નથી. વિવેચકો માને છે કે માત્ર ભવ્ય ઇન્ફ્રાસ્ટ્રક્ચર પૂરતું નથી; મજબૂત ગ્રાસરૂટ માળખું, પારદર્શક પસંદગી અને ગુણવત્તાસભર કોચિંગ જરૂરી છે.
મહિલા ક્રિકેટરોને સ્થાયી પ્રેક્ટિસ સુવિધા ન હોવાની ફરિયાદો સામે આવી છે. BCCIની નીતિ મુજબ રાજ્ય એસોસિએશનોએ સમાન પ્રાથમિકતા આપવી જોઈએ. ઉપરાંત AGMમાં ચર્ચા માટે પૂરતો સમય ન મળતો હોવાનો આક્ષેપ પણ થયો છે. સભ્યો વિકાસના વિરોધી નથી, પરંતુ ખર્ચની વિગતવાર માહિતી, પ્રોજેક્ટ સમયરેખા, ટીમ પ્રદર્શન માટે વ્યૂહાત્મક માર્ગનકશો, મહિલા ક્રિકેટ માટે સમર્પિત સુવિધાઓ અને પારદર્શક શાસનની માંગ કરી રહ્યા છે.
સામા પક્ષે રિવાઇવલ31 જૂથે પોતાના કાર્યકાળની સિદ્ધિઓ રજૂ કરતાં જણાવ્યું છે કે સભ્યોના સહકારથી ભવ્ય સ્ટેડિયમનું નિર્માણ કાર્ય પૂર્ણ કરવામાં આવ્યું છે અને આ પ્રોજેક્ટની બીસીસીઆઈ દ્વારા પ્રસન્નતા વ્યક્ત કરવામાં આવી છે. રિવાઇવલ જૂથનો દાવો છે કે ઇન્ફ્રાસ્ટ્રક્ચર વિકાસ સાથે ખેલાડીઓના સર્વાંગી વિકાસ માટે પણ મહત્વપૂર્ણ પગલાં લેવાયા છે. ગ્રાસરૂટ સ્તરે તાલીમ સુવિધાઓ, કોચિંગ વ્યવસ્થા અને યુવા ખેલાડીઓને પ્રોત્સાહન આપવા આયોજન હાથ ધરાયું છે.
જૂથ દ્વારા શહેરની અંદર એક આધુનિક ક્લબ હાઉસ બનાવવાની જાહેરાત કરવામાં આવી છે, જેથી સભ્યોને વધુ સુવિધાઓ ઉપલબ્ધ થાય. સ્ટેડિયમમાં સભ્યોનું સન્માન જળવાય અને તેમની સુવિધાઓમાં વધારો થાય તેવા પ્રયાસો કરાશે તેમ જણાવ્યું છે.
આ ઉપરાંત પૂર્વ ક્રિકેટરો અને વિધવાઓ માટે સહાય યોજનાઓ પર કામ ચાલી રહ્યું હોવાનું પણ જણાવાયું છે.
