રઢુ, હલધરવાસ અને નડિયાદમાંથી જુગાર રમતા સાત શખ્સો ઝડપાયા | Seven people caught gambling from Radhu Haldharwas and Nadiad
ખેડા જિલ્લામાં જુગારની પ્રવૃત્તિ બેરોકટોક
જે-તે વિસ્તારની પોલીસે જુગારનું સાહિત્ય, રોકડ સહિતની મત્તા જપ્ત કરી ગુનો નોંધ્યો
નડિયાદ: ખેડા જિલ્લામાં જુગારની પ્રવૃત્તિ બેરોકટોક ચાલી રહી છે. ત્યારે પોલીસે રઢુ, હલધરવાસ અને નડિયાદમાં હાર જીતનો જુગાર રમતા સાત જુગારીયાઓને ઝડપી પાડયા હતા. આ બનાવ અંગે જે-તે પોલીસ મથકમાં ગુનો નોંધવામાં આવેલ છે.
ખેડા ટાઉન પોલીસ સોમવારે પેટ્રોલિંગમાં નીકળી હતી. આ દરમિયાન બાતમી મળી હતી કે, રઢુ સીમમાં વારસંગ રોડ ઉપર કેટલાક લોકો પોતાના ફાયદા સારું પત્તા પાનાનો જુગાર રમી રહ્યા છે. જેથી પોલીસે રેડ પાડતા પત્તા પાનાનો જુગાર રમતા બટુક નારણભાઈ પટેલ, રમેશ હમીરભાઈ ઠાકોર અને વિઠ્ઠલભાઈ જીવાભાઇ ઠાકોરને જુગાર રમવાના સાધનો તેમજ રોકડ રૂ.૧,૫૫૦ સાથે ઝડપી પાડયા હતા. જ્યારે બીજા બનાવમાં , મહેમદાવાદ પોલીસે હલધરવાસ ગામના વડનગર વિસ્તારમાં ખુલ્લામાં પત્તા પાનાનો જુગાર રમતા રાકેશભાઈ રવજીભાઈ ખાંટ અને ભુપતભાઈ સનાભાઇ ડાભીને જુગાર રમવાના સાધનો તેમજ રોકડ રૂ.૪૧૦ સાથે ઝડપી પાડયા હતા. આ ઉપરાંત નડિયાદ ટાઉન પોલીસે નડિયાદ બસ સ્ટેન્ડ નજીક પકોડી સામે ખુલ્લી જગ્યામાં વરલી મટકાનો જુગાર લખતા તાલીબહુસેન ગુલામનબી મલેકને રૂ.૭૩૦ રોકડ સાથે ઝડપી પાડયો હતો. આ ઉપરાંત નડિયાદ શહેર પોલીસે જવાહર નગર ડબ્બાવાસમાંથી વરલી મટકાનો જુગાર લખતા કલ્પેશ બાબુભાઈ તળપદાને રોકડ રૂ. ૩૦૦ સાથે ઝડપી પાડયો હતો. આ ચારે બનાવ અંગે જે-તે પોલીસે જુગારધારા હેઠળ ગુનો નોંધી વધુ કાર્યવાહી હાથ ધરી હતી.
