અમદાવાદ ઍરપોર્ટ પર 6.8 કિલો હેરોઇન પકડાયું, પેડલરની મોડસ ઓપરેન્ડી જોઈ અધિકારીઓ ચોંક્યા | Ahmedabad Airport One arrested with over 6 kg heroin drugs Customs Department
અમદાવાદ ઍરપોર્ટ પરથી 6.8 કિલો હેરોઇન સાથે એક શખ્સને ઝડપી પાડવામાં આવ્યો છે. પકડાયેલા હેરોઇનની અંદાજિત કિંમત 30 કરોડથી વધુ આંકવામાં આવી રહી છે. મલેશિયાથી આવેલા પેડલરે હર્બલ સાબુના જુદા જુદા પેકેટમાં હેરોઇન સંતાડ્યું હતું. પણ કસ્ટમ વિભાગે ચાંપતી નજર અને સતર્કતા દાખવી જથ્થાને પકડી લીધો છે.
સાબુના પેકેટમાં સંતાડ્યો 30 કરોડનો મોતનો સામાન
અમદાવાદ ઍરપોર્ટ પર સુરક્ષા એજન્સીઓએ ડ્રગ્સ માફિયાઓના ઇરાદાઓ પર પાણી ફેરવી દીધું છે. મલેશિયાથી આવેલા એક પેડલર પાસેથી અધધ 30 કરોડ રૂપિયાનું 6.8 કિલો હેરોઇન ઝડપાયું છે. તસ્કરીની રીત જોઈને અધિકારીઓ પણ ચોંકી ગયા હતા.
સિલ્વર ફોઇલ અને કાર્બન પેપરમાં લપેટ્યું હતું
X-ray સ્કેનિંગથી બચવા માટે હેરોઇનને સિલ્વર ફોઇલ અને કાર્બન પેપરમાં લપેટવામાં આવ્યું હતું અને હર્બલ સાબુના જુદા જુદા પેકેટમાં છુપાવ્યું હતું. પરંતુ સતર્ક સુરક્ષાકર્મીઓએ આ કરોડોનું ‘ઝેર’ પકડી તપાસના ચક્રો ગતિમાન કર્યા છે
30 હજાર રૂપિયા મળ્યા હતા
પ્રાથમિક પૂછતાછમાં ઝડપાયેલો આરોપી ચેન્નાઇનો રહેવાસી હોવાનું ખૂલ્યું છે. તેને આ જથ્થો અહીંયા લાવવા બદલ 30 હજાર રૂપિયા આપવામાં આવ્યા હોવાની કબૂલાત કરી છે. ઍરપોર્ટ પર ઉતરતાં કેરિયરને આ જથ્થો આપવાનો હતો પકડાઈ જતાં કેરિયર ફોન ઉઠાવી રહ્યો નથી. કસ્ટમ્સ વિભાગે પેડલર અને કેરિયર બંનેના મોબાઇલ નંબરની વધુ તપાસ હાથ ધરી છે.
કેવી રીતે ઝડપાયું?
9 ફેબ્રુઆરીના રોજ અમદાવાદ કસ્ટમ્સના એર ઇન્ટેલિજન્સ યુનિટ(AIU)ના અધિકારીઓએ શંકા જતાં એક મુસાફરને અટકાવ્યો હતો, તે એર એશિયા ફ્લાઇટ નંબર AK-91 દ્વારા કુઆલાલંપુરથી અમદાવાદ આવ્યો હતો. જેના સામાનમાંથી 29 સાબુ જેવા પેકેટની ચકાસણી કરવામાં આવી હતી. જેમાં કુદરતી સાબુ અને હર્બલ સાબુ બારના આડમાં માદક દ્રવ્યોની હેરાફેરી થતી હોવાનું ખૂલ્યું હતું. એક્સ-રે સ્ક્રીનીંગથી બચવા માટે યુવકે હેરોઇન પર ચાંદીના વરખ અને કાર્બન પેપર લપેટ્યા હતા. તેમ છતાં પણ કસ્ટમ વિભાગે તેને ચેકિંગ દરમિયાન ઝડપી લીધો હતો.
આંતર રાષ્ટ્રીય બજારમાં એક કિલો હેરોઇનની કિંમત 5 કરોડ
ઉલ્લેખનીય છે કે ભારતીય બજાર પ્રમાણે હેરોઇનના એક કિલોની કિંમત 2 કરોડ આસપાસ અંદાજી શકાય, પણ આંતરરાષ્ટ્રીય બજાર કિંમત 5 કરોડથી વધુની છે, જેથી પકડાયેલા જથ્થાની કિંમત 30 કરોડ આસપાસ હોવાનું અનુમાન છે. કુલ મળીને, 26 સાબુના કદના બોક્સ અને 3 સફેદ પરબિડીયાઓમાં છુપાયેલ 6.8 કિલો (કુલ) શંકાસ્પદ હેરોઇન NDPS ઍક્ટ, 1985ની જોગવાઈઓ હેઠળ જપ્ત કરવામાં આવ્યું છે. મુસાફરની ધરપકડ કરી આગળની કાર્યવાહી હાથ ધરવામાં આવી છે.
