સાવધાન ! વડોદરા શહેરમાં તૂટેલા ગટરના ઢાંકણની સમસ્યા : વાહન ચાલકો પરેશાન | Problem of broken sewer lids in Vadodara city: Drivers troubled
image : filephoto
Vadodara Corporation : વડોદરા શહેરમાં ઠેર ઠેર સિમેન્ટના તકલાદી ઢાંકણ નંખાઈ રહેલાની ફરિયાદો શરૂ થઈ છે ત્યારે પશ્ચિમ વિસ્તારના ચકલી સર્કલ પાસે શિવ મહેલ નજીકની ગટરનું ઢાંકણ તદ્દન તૂટેલું હોવાથી વાહનચાલકોએ સાવચેતીથી વાહન હંકારવા અંગેનો વિડીયો સોશિયલ મીડિયામાં વાયરલ થયો હતો.
ઉલ્લેખનીય છે કે શહેરમાં ઠેર-ઠેર તકલાદી સિમેન્ટના ઢાંકણ ગટરો ઉપર નાખવામાં આવી રહ્યા છે ત્યારે કેટલીય જગ્યાએ તૂટેલા સિમેન્ટના ગટરના ઢાંકણના કારણે નાના મોટા અકસ્માતોની વણઝાર ચાલી છે. ત્યારે શહેરના પશ્ચિમ વિસ્તારમાં ચકલી સર્કલ પાસે આવેલા શિવમહલ નજીક પણ ગટર પર લગાવેલું સિમેન્ટનું ઢાંકણ તૂટેલી હાલતમાં છે. જાગૃત નાગરિક દ્વારા તૂટેલા આ ઢાંકણ પર વૃક્ષની ડાળી ભરાવી દેવામાં આવી છે. જેથી વાહનચાલકો કાળજી પૂર્વક વાહન ચલાવીને અકસ્માતથી બચી શકે છે. આવા તૂટેલા ઢાંકણના કારણે ક્યારેક સર્જાતો અકસ્માત જાનહાનિનું પણ નિમિત બની શકે છે. શહેરમાં વિવિધ જગ્યાએથી ગટરના આવા તૂટેલા ઢાંકણ પાલિકા તંત્ર તાત્કાલિક બદલે એ જરૂરી છે.
