પંચમહાલ: શહેરાના ભુરખલમાં ‘DJ યુદ્ધ’ ખેલનારા સંચાલકો સામે પોલીસની લાલ આંખ, જાહેરમાં મંગાવી માફી | Police action against organizers of DJ competition in Bhurkhal Shahera Panchmahal
Shahera News : પંચમહાલ જિલ્લાના શહેરા તાલુકાના ભુરખલ ગામે સોશિયલ મીડિયામાં વાઈરલ થયેલા એક વીડિયોએ ભારે ચર્ચા જગાવી હતી. બે DJ વચ્ચે સામસામે રખાયેલી સ્પર્ધા અને તેના પર યુવાનોના અભદ્ર વર્તન મામલે શહેરા પોલીસે કડક કાર્યવાહી કરી બંને DJ સંચાલકોને પાઠ ભણાવ્યો છે.
શું હતી સમગ્ર ઘટના?
ભુરખલ ગામે એક સામાજિક પ્રસંગ દરમિયાન બે DJ સંચાલકોએ નિયમોની ઐસીતૈસી કરીને ‘DJ યુદ્ધ’ (DJ સ્પર્ધા) યોજી હતી. બે મોટા DJ ટ્રકોને સામસામે ઉભા રાખીને જોરશોરથી સંગીત વગાડવામાં આવી રહ્યું હતું. આ દરમિયાન DJ પર ચઢીને કેટલાક યુવાનો જોખમી રીતે નાચી રહ્યા હતા અને અભદ્ર ઈશારાઓ કરતા પણ વીડિયોમાં કેદ થયા હતા.
વીડિયો વાઈરલ થતા પોલીસ એક્શનમાં
આ ઘટનાનો વીડિયો સોશિયલ મીડિયા પર વાયુવેગે વાઈરલ થયો હતો, જે ઉચ્ચ પોલીસ અધિકારીઓના ધ્યાને આવતા શહેરા પોલીસને તાત્કાલિક તપાસના આદેશ અપાયા હતા. વાઈરલ વીડિયોના આધારે પોલીસે બંને DJ સંચાલકોની ઓળખ કરી હતી અને કાયદેસરની કાર્યવાહી હાથ ધરી હતી.
પોલીસે જાહેરમાં મંગાવી માફી
શહેરા પોલીસે આ મામલે કડક વલણ અપનાવતા નિયમોનું ઉલ્લંઘન કરનાર બંને DJ સિસ્ટમને પોલીસે કબ્જે કરી છે. કાયદાનો ભય જળવાઈ રહે અને અન્ય લોકો આવું કરતા અટકે તે માટે પોલીસે બંને DJ સંચાલકો પાસે જાહેરમાં માફી મંગાવી હતી. આ સાથે જાહેર શાંતિનો ભંગ કરવા અને જોખમી કૃત્ય કરવા બદલ ગુનો નોંધવાની તજવીજ હાથ ધરી છે.
પોલીસે આવા તત્વોને સ્પષ્ટ ચિમકી આપી છે કે, તહેવારો કે પ્રસંગોમાં ઉત્સાહના નામે અશ્લીલતા કે જાહેર જનતાને હાલાકી ભોગવવી પડે તેવું વર્તન ચલાવી લેવામાં આવશે નહીં. DJ સંચાલકોએ નિયત ડેસિબલ અને મર્યાદામાં રહીને જ વ્યવસાય કરવાનો રહેશે.
