અમરેલી: સ્ટીલના વેપારીઓને લૂંટતી ગેંગ ઝડપાઈ, પોલીસે લાખોના મુદ્દામાલ સાથે ત્રણને ઝડપ્યા | Steel Traders Duped in Amreli Police Arrest 3 With Fake Cheques and GST Scam
Amreli News: અમરેલી જિલ્લામાં સ્ટીલના વેપારીઓ સાથે છેતરપિંડી આચરતી એક રીઢા ગુનેગારોની ટોળકીને ઝડપી પાડવામાં રાજુલા પોલીસને મોટી સફળતા મળી છે. આ ટોળકી સ્ટીલની ખરીદી સામે વેપારીઓને બેન્કના ખોટા ચેક અને જીએસટી નંબર આપી છેતરપિંડી કરતી હતી. પોલીસે જૂની બારપટોળી ગામ પાસે ઓપરેશન પાર પાડી 3 શખસોની ધરપકડ કરી છે.
પોલીસ કાર્યવાહી અને મુદ્દામાલ
રાજુલા પોલીસને બાતમી મળી હતી કે કેટલીક શંકાસ્પદ વ્યક્તિઓ જૂની બારપટોળીના પાટીયા નજીક આવેલી પડતર જગ્યામાં મુદ્દામાલ સગેવગે કરી રહી છે. પોલીસે બાતમીવાળા સ્થળે દરોડો પાડીને ઘટનાસ્થળેથી મુદ્દામાલ સાથે આરોપીઓને ઝડપી લીધા હતા. આરોપીઓ પાસેથી કુલ 2.99 લાખ રૂપિયાનો મુદ્દામાલ કબજે કર્યો છે, જેમાં સ્ટીલનો જથ્થો અને અન્ય સાધનોનો સમાવેશ થાય છે.
આ પણ વાંચો: અમરેલીના મોટા લીલીયા ગામે શ્વાનોનો આતંક, 6 લોકો અને 8 પશુઓને બચકા ભર્યા
આરોપીઓની ઓળખ
પોલીસે સ્થળ પરથી પાલીતાણાના પંકજ નવાડિયા, વિજય પરમાર અને બાબુ ગોહીલની ધરપકડ કરી છે, જ્યારે અશરફ જુણેજા ભાગવામાં સફળ રહ્યો હતો. જેની શોધખોળ ચાલી રહી છે.
છેતરપિંડીની ‘મોડસ ઓપરેન્ડી’
આ ટોળકી અત્યંત શાતિર રીતે વેપારીઓને વિશ્વાસમાં લેતી હતી. તેઓ સૌ પ્રથમ મોટા જથ્થામાં સ્ટીલનો ઓર્ડર આપતા અને પેમેન્ટના બદલામાં વેપારીને વિશ્વાસ બેસે તે માટે નકલી જીએસટી નંબર આપતા હતા. માલની ડિલિવરી લેતી વખતે બેન્કના એવા ચેક આપતા જે પાસ ન થઈ શકે અથવા નકલી હોય. વેપારીને જ્યારે છેતરપિંડીની ખબર પડે ત્યાં સુધીમાં આરોપીઓ માલ સગેવગે કરી નાખતા હતા.
