અમે તમારી કચેરીમાં આ રીતે વેરો ઉઘરાવવા આવીએ છીએ ?! | We come to your office to collect taxes like this
તમે અમારા પ્રિમાઈસીસમાં હેલ્મેટ-હેલ્મેટ કરો છો તો : રાજકોટ મહાનગરપાલિકાની કચેરીમાં હેલ્મેટના કેસો કરવા પહોંચેલી ટ્રાફિક પોલીસ સાથે સ્ટેન્ડિંગ ચેરમેનને જીભાજોડી
રાજકોટ, : રાજકોટમાં એક સમયે કોઈપણ ભોગે ફરજિયાત હેલ્મેટની અમલવારી કરાવવા માટે પોલીસે કમર કસી લીધી હતી. પરંતુ આખરે ગાંધીનગરથી આદેશ આવતાં પોલીસે પીછેહટ કરવી પડી હતી. આમ છતાં પોલીસ હેલ્મેટને ભૂલી ન હતી.
સરકારી કચેરીઓમાં સમયાંતરે પોલીસ હેલ્મેટની ડ્રાઈવ કરતી રહી હતી. અમુક વાહનચાલકોને પણ હેલ્મેટના મેમા મળતાં રહ્યા હતા. ગયા મહિને હેલ્મેટના કેસો ઓછા થતાં આજે ટ્રાફિક પોલીસ કોર્પોરેશન કચેરીમાં કેસો કરવા માટે પહોંચી ગઈ હતી.
જે અંગેની જાણ થતાં સ્ટેન્ડિંગ કમિટિના ચેરમેન પહોંચ્યા હતા અને ટ્રાફિક પોલીસ સાથે જીભાજોડી કરી હતી. તેમણે પોલીસને કહ્યું કે તમારે કેસો કરવા હોય તો કોર્પોરેશન ચોકમાં જાવ, આ રીતે અમારા પ્રિમાઈસીસને ટાર્ગેટ કરવું વ્યાજબી નથી, અમે વેરા ઉઘરાવવા માટે આ રીતે તમારી કચેરીએ ધામા નાખતા નથી !
જોકે કહે છે કે ટ્રાફિક પોલીસ માની ન હતી. આખરે પોલીસ કમિશનર પાસે મામલો પહોંચતાં ટ્રાફિક પોલીસની કોર્પોરેશન કચેરીમાંથી રૂખસદ થઈ હતી. ટ્રાફિક બ્રાંચના સૂત્રોએ એકલા કોર્પોરેશન કચેરીમાં નહીં પરંતુ અન્ય જગ્યાએ પણ એક-બે કલાક માટે આ ડ્રાઈવ યોજયાનો બચાવ કર્યો હતો. આ અગાઉ પણ સમયાંતરે કોર્પોરેશન કચેરીમાં પોલીસે અરજદારો અને પદાધિકારીઓને દંડતાં ઉહાપોહ થયો હતો.
