ગોધરામાં લૂંટનો નિષ્ફળ પ્રયાસ: ‘જમીન વેચવી છે’ કહી લૂંટારુઓ ઘરમાં ઘૂસ્યા, વૃદ્ધ દંપતીએ પ્રતિકાર કરતા બંને શખસો ભાગ્યા | Panchmahal News Failed robbery attempt at senior citizen couple house Godhra Police
Panchmahal News: પંચમહાલ જિલ્લાના મુખ્ય મથક ગોધરામાં સિનિયર સિટીઝન દંપતીને ટાર્ગેટ બનાવી લૂંટનો પ્રયાસ કરાયો હોવાની ચોંકાવનારી ઘટના સામે આવી છે. શહેરની શાંત ગણાતી ભગવદ્ નગર સોસાયટીમાં બે અજાણ્યા શખસોએ લૂંટના ઈરાદે ઘરમાં પ્રવેશ કર્યો હતો, પરંતુ વૃદ્ધની બહાદુરી સામે લૂંટારુઓના મનસૂબા નિષ્ફળ રહ્યા હતા.
બનાવની વિગત: જમીન બતાવવાના બહાને ઘરમાં પ્રવેશ્યા
ગોધરાની ભગવદ્ નગર સોસાયટીમાં રહેતા સિનિયર સિટીઝન કમલેશભાઈ મોદીના ઘરે બે અજાણ્યા વ્યક્તિ આવ્યા હતા. આ શખસોએ “અમારે જમીન વેચવાની છે” તેમ કહી કમલેશભાઈનો વિશ્વાસ જીત્યો હતો અને વાતોમાં ભોળવી ઘરમાં પ્રવેશ મેળવ્યો હતો. ઘરમાં પ્રવેશતાની સાથે જ બંને શખસોએ દંપતીને નિશાન બનાવી લૂંટ ચલાવવાનો પ્રયાસ કર્યો હતો.
વૃદ્ધની બહાદુરી: સામનો કરતા લૂંટારુઓ ભાગ્યા
લૂંટના ઇરાદે આવેલા શખસો સામે કમલેશભાઈ મોદી ડર્યા વગર અડીખમ ઊભા રહ્યા હતા. તેમણે લૂંટારુઓનો પ્રતિકાર કરતા અને બૂમાબૂમ કરતા બંને શખસો ગભરાઈ ગયા હતા. પકડાઈ જવાની બીકે લૂંટારુઓ લૂંટ કર્યા વગર જ ઘટનાસ્થળેથી નાસી છૂટ્યા હતા. આ ઘટનાને પગલે આસપાસના રહીશોમાં પણ ચકચાર મચી ગઈ હતી.
CCTV ફૂટેજની તપાસ તેજ
આ મામલે કમલેશભાઈ મોદીએ ગોધરા એ-ડિવિઝન પોલીસ મથકે ફરિયાદ નોંધાવી છે. પોલીસે ગુનો નોંધી આરોપીઓને પકડવા માટે ચક્રો ગતિમાન કર્યા છે. પોલીસ દ્વારા સોસાયટી અને આસપાસના વિસ્તારોના CCTV ફૂટેજ મેળવવાની કવાયત શરૂ કરી છે.
