અમદાવાદ: નરોડામાં બે સ્પા સેન્ટરમાં ચાલતા દેહ વ્યાપાર રેકેટનો પર્દાફાશ, 7 મહિલાઓને બચાવી લેવાઈ | Ahmedabad News Prostitution racket running in two spa centers in Naroda exposed

Ahmedabad News: અમદાવાદ શહેર પોલીસના લોકલ ક્રાઈમ બ્રાન્ચ (LCB) ઝોન-4એ ગુરુવારે નરોડા વિસ્તારમાં લક્ઝરી સ્પાની આડમાં ચાલતા ગેરકાયદે દેહ વ્યાપાર રેકેટનો પર્દાફાશ કર્યો, દરોડા પહેલા નકલી ગ્રાહકોને મોકલવામાં આવ્યા હતા, જે બાદ  સાત મહિલાઓને દેહ વ્યાપારમાંથી બચાવી લેવામાં આવી હતી.

તમામ મહિલાઓ ગુજરાત બહારની

LCB ટીમને મળેલી ચોક્કસ બાતમીના આધારે આર્શીવાદ એવન્યુ પર નરોડા હરિદર્શન ચોકડી નજીક સ્થિત બ્લુ હેવન લક્ઝરી સ્પા અને લિટલ ક્લાઉડ લક્ઝરી સ્પામાં દરોડા પાડવામાં આવ્યા હતા. જ્યાં ગેરકાયદે દેહ પ્રવૃત્તિઓ ચલાવવામાં આવી રહી હતી. પોલીસે જણાવ્યું હતું કે મહિલાઓને ગુજરાતની બહારથી લાવવામાં આવી હતી અને દેહ વ્યાપાર માટે દબાણ કરવામાં આવ્યું હતું.

નકલી ગ્રાહકો મોકલીને છટકું ગોઠવવામાં આવ્યું

દરોડા બાદ LCB અધિકારીઓએ જણાવ્યું હતું કે, સ્પાના મેનેજર, તેમની પત્ની સાથે, અન્ય રાજ્યોની મહિલાઓને સોર્સ કરીને કથિત રીતે આ રેકેટ ચલાવી રહ્યા હોવાની જાણકારી મળી હતી. માહિતીના આધારે, ગેરકાયદે પ્રવૃત્તિઓની પુષ્ટિ કરવા માટે નકલી ગ્રાહકો મોકલીને છટકું ગોઠવવામાં આવ્યું હતું. એકવાર ઇનપુટ્સની ચકાસણી થઈ ગયા બાદ દરોડા પાડવામાં આવ્યા હતા, જેમાં સાત મહિલાઓને દેહ વ્યાપારના રેકેટમાંથી બચાવી લેવામાં આવી.

આ પણ વાંચો: અમદાવાદ એરપોર્ટ પર હાઈ-એલર્ટ જાહેર, મુસાફરોને 3 કલાક વહેલા પહોંચવા સૂચના

સ્પાના મેનેજર અને તેની પત્નીની ધરપકડ

પોલીસે સ્પાના મેનેજર ધર્મેન્દ્ર સિંહ હરવેન્દ્ર સિંહ અને તેની પત્ની કમલજીતની ધરપકડ કરી છે. આ દંપતી હાલમાં નરોડામાં રહે છે. તેમનું વતન પંજાબના તરનતારન જિલ્લાનું પાંડોરી ગોલા ગામ છે, આરોપીઓ સામે દેહ વ્યાપાર સંબંધિત જોગવાઈઓ હેઠળ કાયદેસરની કાર્યવાહી શરૂ કરવામાં આવી છે, બચાવાયેલી મહિલાઓના પુનર્વસન અને શહેરમાં સ્પા વ્યવસાયના આડમાં તસ્કરી અને શોષણમાં સામેલ નેટવર્કને શોધવાના પ્રયાસો કરવામાં આવી રહ્યા છે. જ્યારે રેકેટ સાથે સંકળાયેલા અન્ય વ્યક્તિઓને ઓળખવા અને અન્ય સ્થળોએ સમાન પ્રવૃત્તિઓ ચલાવવામાં આવી રહી છે કે કેમ તે શોધવા માટે વધુ તપાસ ચાલી રહી છે.