સુરેન્દ્રનગર-લખતર રોડ પર કાર ઝાડ સાથે અથડાતા એક જ પરિવારનાં ચાર લોકોનાં મોત, એક ઘાયલ

સુરેન્દ્રનગર : આજે બુધવારે ગુજરાતમાં બે ગંભીર અકસ્માત સર્જાયા છે. જેમાં વડોદરાની વાઘોડિયા ચોકડી પાસે થયેલા અકસ્માતમાં10 મુસાફરોના મોત નિપજ્યા છે. તો બીજી તરફ, સુરેન્દ્રનગરના લખતર રોડ પર કાર ઝાડ સાથે અથડાતા ગંભીર અકસ્માત થતા એક જ પરિવારનાં 4 લોકોના ઘટના સ્થળે કમકમાટીભર્યા મોત નિપજ્યા છે. આ અકસ્માતમાં માતા, પુત્ર, પુત્રવધૂ, અને તેમની પુત્રીનું મોત નીપજ્યું છે. જ્યારે કાર ચલાવી રહેલા પૌત્રને ગંભીર ઇજા પહોંચતા તેને સારવાર માટે હૉસ્પિટલમાં ખસેડ્યો છે. દુર્ઘટના બાદ લોકોનાં ટોળાં એકઠાં થયાં હતાં. પોલીસ અને 108 એમ્બ્યુલન્સની ટીમ ઘટનાસ્થળે આવી પહોંચી હતી.

પ્રાપ્ત માહિતી અનુસાર, લખતરનું પ્રજાપતિ કુટુંબ મોગલધામ ભગુડા દર્શન કરી પરત લખતર ફરી રહ્યા હતા ત્યારે તેઓ વઢવાણ ગેબનસા પીર સર્કલ પાસે ચાપાણી પી અને લખતર તરફ જવા નીકળ્યા હતા. ત્યારે વઢવાણ લખતર રોડ પર આવેલી રામ પેપરમિલ પાસે પહોંચતા ડ્રાઇવરે સ્ટીયરીંગ પરનો કાબુ ગુમાવતા ગાડી રોગ સાઈડમાં જઇ લીમડાના ઝાડ સાથે અથડાઈ બાજુના ખેતરમાં ઉતરી ગઈ હતી. ચોટીલા જતા પદયાત્રીઓએ ગાડી ખેતરમાં પડેલી જોઈ 108ને ફોન કરતા લખતર 108ના દાજીભાઈ રોજાસરા અને કિરપાલસિંહ રાણા ત્યાં પહોંચી ગયા હતા.