બાઇક પર આવેલી ચોર ટોળકીનો કહેર વાસણા કોતરીયા ગામમાં બે મકાનોના તાળા તોડી સોના, ચાંદીના દાગીનાની ચોરી | theft in two house at vasna kotriya village
વડોદરા, તા.21 વડોદરા નજીક આવેલા વાસણા કોતરીયા ગામમાં બે મકાનોમાં ચોરી કરીને બાઇક પર આવેલી ટોળકીએ ગ્રામજનોમાં ગભરાટ ફેલાવ્યો છે. એક મકાનમાંથી રૃા.૧૫.૪૫ લાખની મતા ચોરો ઉઠાવી ગયા છે.
વાસણા કોતરીયા ગામે ઊંડા ફળિયામાં રહેતા શૈલેષ ગણપતભાઇ સોલંકીએ મંજુસર પોલીસ સ્ટેશનમાં નોંધાવેલી ફરિયાદમાં જણાવ્યું છે કે હું રણોલી જીઆઇડીસીની ખાનગી કંપનીમાં નોકરી કરું છું. મારાં માતા-પિતા ગામની સીમમાં ખેતરમાં રહે છે તેમજ પત્નીએ પુત્રીને જન્મ આપ્યો હોવાથી તે હાલ પિયરમાં છે. તા.૧૮ના રોજ હું નોકરી પર ગયો હતો અને વધારે કામ હોવાથી નાઇટ શિફ્ટમાં પણ કંપનીમાં રોકાયો હતો. રાત્રે માતા-પિતા જમીને ઘરને લોક મારી ખેતરે સૂવા જતા રહ્યા હતાં.
નાઇટ શિફટ કરીને હું સવારે ઘેર આવ્યો ત્યારે ઘરની જાળીનો નકૂચો તૂટેલો હતો અને ઘરની અંદર જઇને ખાત્રી કરતા સામાન વેરવિખેર જણાયો હતો. ત્રીજા રૃમમાં મૂકેલી તિજોરીના લોક તૂટેલા અને અંદરથી રૃા.૧૩ લાખ કિંમતના ૧૦ તોલા સોનાના દાગીના, રૃા.૧.૭૫ લાખ કિંમતના ૭૦૦ ગ્રામ ચાંદીના દાગીના અને રોકડ ૭૦ હજારની ચોરી થઇ હતી.
દરમિયાન જાણવા મળ્યું હતું કે પાડોશમાં રહેતા ભરત દેવજીભાઇ પરમારના ઘરના પણ તાળા તૂટયા છે. આ ઘર લાંબા સમયથી બંધ હોવાથી કેટલી રકમની ચોરી થઇ તે જાણવા મળ્યું ન હતું. આ અંગે મંજુસર પોલીસે તપાસ કરતાં ગામના ચોકમાં મૂકેલા સીસીટીવી કેમેરામાં બાઇક પર ચોરો આવતા જણાયા હતાં. પોલીસે આ દિશામાં વધુ તપાસ હાથ ધરી છે.
