વડોદરામાં ભયાનક અકસ્માત, રાજસ્થાનથી સુરત જતી બસ ટ્રકમાં ટકરાઈ, 5 લોકોના દર્દનાક મોત | vadodara kotambi road accident bus truck collision
Bus And Truck Accident In Vadodara: વડોદરામાં ભયાનક અકસ્માતની ઘટના ઘટી છે. જેમાં કોટંબી સ્ટેડિયમ નજીક રાજસ્થાનથી સુરત જતી લકઝરી બસ અને ટ્રક વચ્ચે જોરદાર ટક્કર થતાં 5 લોકોના દર્દનાક મોત નીપજ્યા છે. જ્યારે 20થી વધુ લોકો ઇજાગ્રસ્ત થયા હોવાની માહિતી મળી રહી છે. ગંભીર અકસ્માતને પગલે પોલીસ, ફાયર સહિતની ટીમ ઘટના સ્થળે પહોંચી બચાવ કામગીરી હાથ ધરી છે. જ્યારે ઇજાગ્રસ્તને સારવાર માટે હોસ્પિટલમાં ખસેડવામાં આવી રહ્યા છે.
ટ્રકની પાછળ લક્ઝરી બસ ઘૂસી જતા પાંચના મોત
બનાવની પ્રાથમિક વિગતો મુજબ, રાજસ્થાના બાસવાડાથી સુરત તરફ જઈ રહેલી એક લક્ઝરી બસ પરોઢિયે ચારેક વાગે વડોદરા હાલોલ રોડ ઉપર કોટંબી સ્ટેડિયમ પાસે ઉભેલા ટ્રક પાછળ ધડાકાભેર ઘુસી જતા અકસ્માત સર્જાયો હતો. અકસ્માતને પગલે ગ્રામજનો તેમજ વાહન ચાલકો દોડી આવ્યા હતા.
બનાવને પગલે ચારથી પાંચ કિલોમીટર સુધી ટ્રાફિક જામ સર્જાયો હતો. દુર્ઘટનાની જાણ થતા વડોદરા ફાયર બ્રિગેડની પાણીગેટ તેમજ ઈમરજન્સી રિસ્પોન્સ સેન્ટરની ટીમો દોડી આવી હતી, જ્યારે એનડીઆરએફની ટીમ પણ આવી પહોંચી રેસ્ક્યૂ ઓપરેશન હાથ ધર્યું હતું.
બસના પતરા કાપી મુસાફરોને બહાર કાઢ્યા
ફાયર બ્રિગેડ દ્વારા JCBની મદદથી બંને વાહનોને છૂટા કરવામાં આવ્યા હતા. તો બીજી ટીમો દ્વારા બસના પતરા કાપીને મુસાફરોને બહાર કાઢવામાં આવ્યા હતા. આ બનાવમાં પાંચ મુસાફરના મોત નીપજ્યા છે. જ્યારે 26 જેટલા મુસાફરોને ઈજાઓ થતાં તેમને સિવિલ હોસ્પિટલ તેમજ ખાનગી હોસ્પિટલોમાં દાખલ કરવામાં આવ્યા છે. જેમાં પાંચની હાલત ગંભીર હોવાનું જાણવા મળ્યું છે. બનાવને સ્થળે દોડી આવેલી પોલીસ દ્વારા ટ્રાફિકની સાથે સાથે બનાવને લગતી કાર્યવાહી કરવામાં આવી રહી છે.
