છોટાઉદેપુરમાં બેફામ ‘મોતની સવારી’ સામે કાર્યવાહી: અકસ્માતો વધતા પોલીસ બાદ RTO પણ એક્શનમાં | Chhota Udaipur News RTO action on Tufan cars running with more passengers than capacity
Chhota Udaipur News: છોટાઉદેપુર અને રંગપુર વિસ્તારમાં ગેરકાયદે અને ક્ષમતા કરતાં વધુ મુસાફરો ભરીને દોડતી તુફાન ગાડીઓ સામે RTO તંત્ર દ્વારા કડક કાર્યવાહી હાથ ધરવામાં આવી છે. હાલમાં જ એક ઓવરલોડ તુફાન ગાડીનો ગમખ્વાર અકસ્માત સર્જાયા બાદ ઊંઘમાંથી જાગેલા વહીવટી તંત્રએ તાબડતોબ ચેકિંગ ડ્રાઈવ શરૂ કરી છે. આ સ્પેશિયલ ડ્રાઈવ દરમિયાન નિયમોનું સરેઆમ ઉલ્લંઘન કરતી 6 જેટલી ગાડીઓને ઝડપી પાડી તેમની સામે દંડાત્મક પગલાં લેવામાં આવ્યા છે. RTOની આ આકસ્મિક કાર્યવાહીથી ગેરકાયદે રીતે વાહન ચલાવતા ચાલકોમાં ભારે ફફડાટ વ્યાપ્યો છે.
જીવના જોખમે દોડતા વાહનો હવે RTOના રડારમાં
ખાસ કરીને સૌરાષ્ટ્ર અને કાઠિયાવાડ તરફ ખેત મજૂરોને ઘેટાં-બકરાંની જેમ ભરીને જીવના જોખમે દોડતા વાહનો હવે RTOના રડારમાં આવ્યા છે. શ્રમિકોની લાચારીનો ફાયદો ઉઠાવી નિયમોને નેવે મૂકનાર તત્વો સામે તવાઈ બોલાવવામાં આવી રહી છે. RTO તંત્ર મુજબ મુસાફરોના જીવ સાથે રમત કરનારા વાહન ચાલકો સામે આગામી દિવસોમાં પણ આ પ્રકારની સઘન ચેકિંગ ઝુંબેશ ચાલુ રહેશે અને નિયમભંગ કરનારાઓ સામે દંડાત્મક તેમજ કાયદાનું શસ્ત્ર ઉગામવામાં આવશે.
ગઇકાલે થયો હતો ભયંકર અકસ્માત
મહત્વનું છે કે ગઇકાલે 6 જૂનના રોજ છોટા ઉદેપુર અને મધ્ય પ્રદેશને જોડતા નેશનલ હાઇવે નંબર 56 પર રંગપુરના જોડાવાટ ગામ પાસે એક હૃદયકંપાવનારો અકસ્માત સર્જાયો હતો. મધ્યપ્રદેશથી ગુજરાતમાં મજૂરી અર્થે આવી રહેલા શ્રમિક પરિવારોની મુસાફરી લોહીયાળ સાબિત થઈ હતી. ક્ષમતા કરતાં વધુ મુસાફરો ભરેલી કાર અને ટ્રેક્ટર વચ્ચે જોરદાર ટક્કર થઈ હતી. આ ગમખ્વાર અકસ્માતમાં એક વ્યક્તિનું ઘટનાસ્થળે જ કમકમાટીભર્યું મોત નીપજ્યું છે, જ્યારે 20થી વધુ મુસાફરોને નાની-મોટી ઇજાઓ પહોંચી હતી. કારની અંદર 20 જેટલા મુસાફરોને ઠસોઠસ ભરવામાં આવ્યા હતા, એટલું જ નહીં પણ કારની ઉપર કેટલીક બાઈક પણ લાદેલી હતી.
