RTEનો ત્રીજો રાઉન્ડ આજથી શરૂ, 7022 બેઠકો હજુ ખાલી, જાણો વાલીઓએ હવે શું કરવાનુ? | Gujarat RTE Admission 2026 Round 3 Begins From Today Over 7000 Seats Vacant
Gujarat RTE Admissions: RTE હેઠળ ધો. 1માં વિનામૂલ્યે પ્રવેશ માટેની સરકારની ઓનલાઇન કોમન પ્રક્રિયામાં બીજો રાઉન્ડ પૂર્ણ થઈ ગયો છે. બીજા રાઉન્ડમાં વધુ 4244 બાળકોનો પ્રવેશ થયો છે. જ્યારે બીજા રાઉન્ડ બાદ પણ હજુ 7022 બેઠકો ખાલી પડી છે. જેના માટે આજે 6ઠ્ઠી જૂનથી ત્રીજો ઓનલાઇન રાઉન્ડ શરૂ કરાશે.
પ્રથમ રાઉન્ડમાં 77,925ને પ્રવેશ
રાઇટ ટુ એજ્યુકેશન એક્ટ અંતર્ગત ખાનગી સ્કૂલોમાં ધો. 1માં 25 ટકા બેઠકો પર મેરિટ અને કેટેગરી મુજબ આવક મર્યાદા સહિતના નિયમોને ધ્યાને લઈને વિનામૂલ્યે પ્રવેશ અપાય છે. આ વર્ષે 9770 ખાનગી સ્કૂલોની 83 હજારથી વધુ બેઠકો સામે 1.82 લાખથી વધુ વાલીઓની અરજીઓ માન્ય થઈ હતી. પ્રથમ રાઉન્ડમાં 77,925 બાળકોને પ્રવેશ ફાળવાયો હતો.
બીજા રાઉન્ડમાં 5,814 બેઠકોની ફાળવણી
એલોટમેન્ટમાં ખાલી રહેલી આ બેઠકો અને વાલીઓએ પ્રવેશ કન્ફર્મ ન કરાવતા તેમજ કન્ફર્મ કરાવ્યા બાદ પ્રવેશ રદ કરાવતા ખાલી રહેલી કુલ 11 હજારથી વધુ બેઠકો માટે બીજો રાઉન્ડ હાથ ધરાયો હતો. બીજા રાઉન્ડમાં 5814 બેઠકોમાં પ્રવેશ ફાળવાયો હતો. જેમાંથી 4244 બાળકોનો પ્રવેશ કન્ફર્મ થઈ ગયો છે.
6થી 8 જૂન સુધી સ્કૂલ પસંદગીની તક
RTEના આ બીજા રાઉન્ડ બાદ હવે 7022 બેઠકો ખાલી પડી છે. જેમાં અંગ્રેજી માધ્યમની 3911, ગુજરાતી માધ્યમની 1358 અને હિન્દી માધ્યમની 1578 તથા અન્ય માધ્યમની 175 બેઠકો છે. ત્રીજા રાઉન્ડમાં ભાગ લેવા માટે લાયક 1.02 લાખથી વધુ વાલીઓને પ્રાથમિક શિક્ષણ નિયામક કચેરીની આરટીઈ પ્રવેશ શાખા દ્વારા એસએમએસ મોકલીને સ્કૂલ પસંદગી માટે જાણ કરી દેવાઈ છે. વાલીઓ 6થી 8 જૂન સુધીમાં ઓનલાઇન સ્કૂલ પસંદગી કરી શકશે. નવી સ્કૂલો પણ પસંદ કરી શકાશે અને અગાઉની સ્કૂલોની ફેરબદલ પણ કરી શકાશે. અમદાવાદ ગ્રામ્યમાં અત્યાર સુધીમાં કુલ 2091 ફાળવેલ પ્રવેશમાંથી 1899 પ્રવેશ અને શહેર (કોર્પોરેશન વિસ્તાર)માં 14,579 ફાળવેલ પ્રવેશમાંથી 13,660 પ્રવેશ કન્ફર્મ થઈ ચૂક્યા છે. કુલ મળીને 83,687 બેઠકોમાંથી 77,425 બેઠકોમાં પ્રવેશ થઈ ગયો છે.
