વડોદરામાં લોકોનો ફરી હોબાળો, સ્માર્ટ મીટર લગાવવા ગયેલી વીજ કંપનીની ટીમને પાછા જવું પડ્યું | People protest again in Vadodara MGVCL team that went to install smart meters had to return
Vadodara Smart Meter : લોકોના ભારે વિરોધ વચ્ચે પણ વડોદરા શહેરમાં યેન કેન પ્રકારે મધ્ય ગુજરાત વીજ કંપની જૂના મીટરો કાઢીને સ્માર્ટ મીટરો લગાવવા માટે કવાયત કરી રહી છે. જોકે તેના કારણે વીજ કંપનીના કર્મચારીઓને લોકોના રોષનો ભોગ બનવાનો વારો આવી રહ્યો છે.
શહેરના કપૂરાઈ ચોકડી પાસે આવેલા સાંઈ જલા હાઈટસ નામના એપાર્ટમેન્ટમાં સ્માર્ટ મીટરો લગાવવા માટે ગયેલી વીજ કંપનીની ટીમને વિરોધના પગલે પાછા ફરવાનો વારો આવ્યો હતો.
સ્થાનિક લોકોએ કહ્યું હતું કે, અહીંયા 72 ફ્લેટ આવેલા છે. આ પહેલા કેટલાક ફ્લેટમાં વીજ જોડાણ આપવાનું હતું ત્યારે જ સ્માર્ટ મીટર લગાવાયા હતા. જોકે બીજા ફ્લેટસમાં જૂના મીટરોની જગ્યાએ સ્માર્ટ મીટરો લગાવવા માટે વીજ કંપનીએ નોટિસ આપી હતી. તે સમયે પણ અમે વિરોધ કર્યો હતો. આમ છતા આજે વીજ કંપનીની ટીમ સંખ્યાબંધ સ્માર્ટ મીટર લઈને આવી ગઈ હતી. કર્મચારીઓએ કહ્યું હતું કે, સ્માર્ટ મીટર ફરજિયાત છે અને તમારે આ મીટર લગાવવા જ પડશે. જેની સામે અમે મીટર ફરજિયાત હોવાનો કાગળ બતાવવા માટે દલીલ કરી હતી. અમને લાગે છે કે, સ્માર્ટ મીટર નાંખવાથી વીજ બિલ વધારે આવે છે. લોકોનું કહેવું હતું કે, ભારે હોબાળો અને માથાકૂટ બાદ વીજ કંપનીની ટીમ સ્માર્ટ મીટરો નાંખ્યા વગર પાછી ફરી હતી પણ અમને લાગે છે કે, ગમે ત્યારે પણ સ્માર્ટ મીટરો લગાવવા માટે વીજ કર્મચારીઓ આવશે.
