વડોદરામાં ઈમ્પોર્ટેડ ખાદ્ય પદાર્થોનું ચેકિંગ : પેકેજિંગ અને લેબલિંગ અંગે ખોરાક શાખાની તપાસ | Checking of imported food items in Vadodara: Food branch inspects packaging and labeling
Vadodara Food Safety : વડોદરા કોર્પોરેશનની ખોરાક શાખા એ ઇ-કોમર્સ પ્લેટફોર્મ પરથી આયાત થતા ખાદ્ય પદાર્થોના નમુના લેવાના શરૂ કર્યા છે. ખાસ કરીને ઈમ્પોર્ટ થતી વસ્તુઓ પર લાગવામાં આવેલ લેબલિંગનું વેરિફિકેશન અને સ્ક્રૂટિની કરવા રાજ્ય સરકારની આવેલી સૂચનાના આધારે તપાસ શરૂ કરી છે. છેલ્લા ઘણા દિવસોથી ઈ-કોમર્સ પ્લેટફોર્મ પર વેચાણ વધી રહ્યું છે.
ખાસ કરીને ઈમ્પોર્ટ થતી વસ્તુઓની માંગ પણ દિવસો દિવસ વધી રહી છે. જેને ધ્યાનમાં રાખીને રાજ્ય સરકારમાંથી આવેલ સૂચનાના આધારે પાલિકાના આરોગ્ય વિભાગના ફૂડ ઇન્સ્પેક્ટર દ્વારા વિવિધ દુકાનો ખાતે તપાસ શરૂ કરવામાં આવી છે. અલગ અલગ ફૂડ ઇન્સ્પેક્ટરો દ્વારા વિવિધ દુકાનો પર જઈને સેમ્પલ લેવાની પ્રક્રિયા હાથ ધરી છે.
ઈમ્પોર્ટેડ વસ્તુઓની દુકાનમાં દરેક પ્રોડક્ટ પર લેબલિંગ, બેચ નંબર, મેન્યુફેક્ચરિંગ તારીખ અને એફ.એસ.એસ.આઇ.ના નિયમનું પાલન થાય છે કે નહીં? તેની તપાસ કરવા જણાવ્યું હતું. જે મુજબ નમૂના લેવામાં આવ્યા છે. આ સાથે આગામી સમયમાં વિવિધ મોલમાં પણ વેચાતી ઈમ્પોર્ટેડ વસ્તુઓ અંગે તપાસ કરવામાં આવી શકે છે.
