એફવાયબીકોમની એન્ટ્રન્સ એક્ઝામમાં ૯૧ ટકા વિદ્યાર્થીઓની હાજરી, 31મેએ મેરિટ લિસ્ટ | commerce faculty of msu conduts entrance exam
વડોદરાઃ એમ.એસ.યુનિવર્સિટીની સૌથી મોટી કોમર્સ ફેકલ્ટીમાં એફવાયબીકોમમાં પ્રવેશ માટે લેવાયેલી એન્ટ્રન્સ એક્ઝામમાં ૯૧ ટકા વિદ્યાર્થીઓની હાજરી નોંધાઈ હતી.
એફવાયમાં પ્રવેશ માટે પહેલી વખત લેવાયેલી ઓનલાઈન એન્ટ્રન્સ એક્ઝામ માટે રજિસ્ટ્રેશન કરાવનાર ૧૦૦૦૦ ઉપરાંત વિદ્યાર્થીઓમાંથી ૯૩૬૬ વિદ્યાર્થીઓ પરીક્ષામાં બેઠા હતા.સવારે ૧૦ થી ૧૨માં લેવાયેલી ઓનલાઈન એક્ઝામમાં વિદ્યાર્થીઓને ૧૦૦ પ્રશ્નો પૂછવામાં આવ્યા હતા.લગભગ ૧૦૦ જેટલા અધ્યાપકો અને કર્મચારીઓએ આ પરીક્ષામાં ફરજ બજાવી હતી અને હેલ્પ લાઈન પર વિદ્યાર્થીઓને માર્ગદર્શન આપ્યું હતું.
હવે તા.૩૧ મેના રોજ મેરિટ લિસ્ટ જાહેર કરવામાં આવશે.તા.૨ થી ૬ જૂન દરમિયાન પ્રવેશ માટે ક્વોલિફાય થયેલા વિદ્યાર્થીઓના ડોક્યુમેન્ટની ચકાસણી થશે.આ માટે વિદ્યાર્થીઓએ દસ્તાવેજો સાથે ફરજિયાત હાજર રહેવું પડશે.જે માટેની સૂચનાઓ યુનિવર્સિટીની વેબસાઈટ અને જીકાસના પોર્ટલ પર હવે પછી જાહેર કરવામાં આવશે.
ફેકલ્ટી સૂત્રોએ કહ્યું હતું કે, જૂનના બીજા કે ત્રીજા સપ્તાહથી એફવાયબીકોમનું શિક્ષણકાર્ય શરુ થાય તેવી શક્યતાઓ છે.
