કેરાલા પોલીસના કોન્સ્ટેબલોને ધક્કો મારી રાજધાની એક્સપ્રેસ ટ્રેનમાંથી ડ્રગ્સ કેસનો આરોપી હાથકડી સાથે ફરાર | drugs case accused abscond from in train
વડોદરા, તા.24 વડોદરા રેલવે સ્ટેશન પર આવેલી રાજધાની એક્સપ્રેસ ટ્રેનમાં કેરાલા પોલીસના બે કોન્સ્ટેબલોને ધક્કો મારી ડ્રગ્સનો આરોપી હાથકડી સાથે ફરાર થઇ જતા પોલીસ દ્વારા તેની શોધખોળ હાથ ધરવામાં આવી છે.
પ્રાપ્ત માહિતી મુજબ કેરાલાના કોઝીકોડ ગ્રામ્યના મુક્કમ પોલીસ સ્ટેશનમાં નોંધાયેલા એનડીપીએસના બે ગુનામાં પોલીસે મોહમંદ હનીફા અબ્દુલબકર (રહે.ખુલ્લમપડી, જિલ્લો કોઝીકોડ, કેરાલા)ની ધરપકડ કરવામાં આવી હતી. તેની પૂછપરછ દરમિયાન તપાસનો દોર હઝરત નિઝામુદ્દીન(દિલ્હી) સુધી લંબાયો હોવાથી તા.૨૨ના રોજ રાત્રે બે વાગે પીઆઇ નીબીન જોય ક્રિશ્યન તેમજ અન્ય સ્ટાફ સાથે આરોપી મોહંમદ હનીફાને સાથે રાખી કોઝીકોડ રેલવે સ્ટેશનથી રાજધાની એક્સપ્રેસ ટ્રેનમાં બેસી હઝરત નિઝામુદ્દીન જવા રવાના થયા હતાં.
વડોદરા રેલવે સ્ટેશન પરના પ્લેટફોર્મ નંબર-૩ પર મોડી રાત્રે સાડા બાર વાગ્યે ટ્રેન આવીને ઊભી રહી હતી. આ વખતે મોહંમદ હનીફાને કહેવાથી હેડ કોન્સ્ટેબલ બીનોય તેમજ અનીશ આરોપીને વોશરૃમ લઇ ગયા હતાં. વોશરૃમ બાદ પરત આવતી વખતે આરોપી વોશ બેસીન પાસે હાથ ધોતો હતો ત્યારે તેણે બંને કોન્સ્ટેબલોને છાતીના ભાગે ધક્કો મારતા બીનોય નીચે પડી ગયો હતો જેનો લાભ લઇ મોહમંદ હનીફ બીજા કોચ તરફ ભાગ્યો હતો.
તેની પાછળ કોન્સ્ટેબલ અનીશ ભાગ્યો હતો અને બીનોયે કોચમાં આવીને પીઆઇને જાણ કરતા કેરાલા પોલીસે ટ્રેનમાં આરોપીને પકડવા માટે નાસભાગ કરી મૂકી હતી પરંતુ તે મળ્યો ન હતો. બાદમાં રતલામથી પરત આવીને વડોદરા રેલવે સ્ટેશનના સીસીટીવી કેમેરા જોવા છતાં ભાગી ગયેલા મોહંમદ હનીફાનો કોઇ પત્તો મળ્યો ન હતો. પોલીસે જણાવ્યું હતું કે મોહંમદ હનીફાએ જમણા હાથમાં હાથકડી પહેરી હતી. ઉપરોક્ત વિગતોની ફરિયાદના આધારે વડોદરા રેલવે પોલીસે વધુ તપાસ હાથ ધરી છે.
