પેટ્રોલ-ડીઝલ અને CNG મોંઘા થતાં ટેક્સી ભાડુ કિ.મી. દીઠ 3 રૂપિયા વધ્યું, સ્કૂલ બસના ભાડા વધશે | Petrol Diesel & CNG Price Rise Pushes Taxi Fares Up School Bus Charges Likely to Increase
Taxi Fares Surge After Fuel Price Hike: પેટ્રોલિયમ પેદાશોના ભાવવધારાથી હવે ટેક્સીનો ધંધો પણ બાકાત રહ્યો નથી. નાના ટેક્સી ઓપરેટરોએ કિલોમીટર દીઠ 2થી 3 રૂપિયાનો ભાવવધારો કરી નાખ્યો છે, જ્યારે મોટા ઓપરેટરો હજુ ભાવવધારા બાબતે અવઢવમાં છે. શહેરનાં એક ટેક્સી ઓપરેટરે જણાવ્યું કે આ વખતે આમ પણ ટેક્સીના ધંધામાં મંદી છે. છેલ્લા 23 વર્ષમાં આ પ્રકારની મંદી પહેલી વખત જોઇ છે. તેમાં પણ ડીઝલ, સીએનજીના ભાવવધારાએ અમારા ધંધાની કમર તોડી નાખી છે.
સંચાલકોને ભાડા વધારવાથી ગ્રાહકો ગુમાવવાનો ડર, રિક્ષા- કેબનાં ભાડા વધવાના સંકેત
અમારે પણ હવે નાછૂટકે ભાડા વધારવા પડે તેમ છે. પરંતુ જો તેવું કરવા જઇએ તો ગ્રાહકો ગુમાવવાનો ડર લાગે છે એટલે હાલ અમે ભાડા વધાર્યા નથી. પરંતુ હાલમાં જે સ્થિતિ છે તે જોતાં ટૂંક સમયમાં ભાડા વધારવા જ પડશે તેવું જણાય છે. કેન્દ્ર સરકાર એક ઝાટકે પેટ્રોલિયમ પેદાશોનાં ભાવવધારાને બદલે થોડા-થોડા ભાવ વધારી રહી છે. આ પણ વધારવાના મૂડમાં છે પરંતુ કહે છે કે જો ભાડા વધારે તો એસટી સાથેની હરિફાઇમાં ગ્રાહકો ગુમાવવા પડે તે ડરથી ભાડા વધારી શકતા નથી.
રાજકોટમાં 42 હજાર જેટલી ઓટો રિક્ષા છે. રિક્ષા એસોસિયેશનનાં જણાવ્યાનુસાર, અમે હજુ ભાડું વધાર્યું નથી પરંતુ જો સીએનજીનો ભાવ હજુ પણ વધશે તો અમારે પણ નાછૂટકે ભાડું વધારવું પડશે. શહરોમાં કેબના ભાડા પણ આવતા માસથી વધારી દેવાય તેવા સંકેતો મળ્યા છે. આ તમામ પાસા જોતાં પહેલેથી જ મોંઘવારીની ચક્કીમાં પીંસાતી પ્રજાને આગામી દિવસોમાં ભાવ વધારાના ડામ સતત સહન કરવા પડે તેવી સ્થિતિનું નિર્માણ થયું છે.
અમદાવાદના ભાડામાં પણ અમુક ડ્રાઈવરોએ વધારો કર્યો
રાજકોટથી દરરોજ મોટી સંખ્યામાં પેસેન્જરો ટેક્સીમાં બીજા શહેરોમાં અવર-જવર કરે છે. અમદાવાદ માટે મુખ્યત્વે ગ્રિનલેન્ડ ચોકડીથી અનેક ટેક્સી ઉપડે છે. જેમાંથી અમુક ટેક્સી ડ્રાઈવરોએ ભાડા વધારો કરી દીધો છે, જ્યારે અમુક ટેક્સી ડ્રાઈવરોએ હજૂ ભાડું વધાર્યું નથી. તેમનું કહેવું છે કે જો ડિઝલ કે ગેસના ભાવ હજૂ પણ વધશે તો તેમણે પણ નાછૂટકે ભાડા વધારો કરવો પડશે.
કઈ કારનું હવે શું ભાડું
અગાઉ વિસ્ટા કારનાં પ્રતિ કિલોમીટરનો ભાવ 18 રૂપિયા હતો, જે હવે 20 રૂપિયા, ડીઝાયર અને અર્ટીગા કારનો પ્રતિ કિલોમીટરનો ભાવ અનુક્રમે 11 રૂપિયાથી વધારીને 13 રૂપિયા અને 12 રૂપિયાથી વધારીને 14 રૂપિયા કરી નાખ્યો છે. ટેમ્પો ટ્રાવેલર કેમિનિ બસનો પ્રતિ કિલોમીટરનો ભાવ 35 રૂપિયાથી વધારી 38 રૂપિયા કરી નાખ્યો છે.
અગાઉ ડ્રાઇવરો મળતા નહીં, જ્યારે હવે પરિસ્થિતિ ઉલ્ટી
અગાઉ ટેક્સી ઓપરેટરો પાસે ડ્રાઇવરોની અછત રહેતી હતી પરંતુ હવે મંદીને કારણે ટેક્સી ઓપરેટરોનું કહેવું છે કે ઘણાં ડ્રાઇવરો બેકાર બની ગયા છે, જેને કારણે સામેથી કામ માંગવા આવી રહ્યા છે. અગાઉ જ્યાં ડ્રાઇવરો શોધવામાં મુશ્કેલી પડતી હતી તેને બદલે હાલની પરિસ્થિતિમાં ડ્રાઇવરોને ના પાડવી પડે છે.
ક્યાંક ટોલ ટેક્સ, ડ્રાઇવરોનાં ભોજન સહિતનો ખર્ચ વધ્યો
અમુક ટોલનાકા ઉપર અગાઉથી જ 5થી 10 રૂપિયાનો ભાવવધારો કરી દેવાયો છે. અગાઉ એક કારનાં ઓઇલ બદલવાનાં અને મેઇન્ટેનન્સનો ખર્ચ જ્યાં 1700 રૂપિયા આવતો હતો તે હવે વધીને 1900 રૂપિયા થઈ ગયો છે. ડ્રાઇવરો જમવા જાય તેનું બિલ પણ હવે વધુ આવે છે. આ બધા કારણોસર નાછૂટકે ભાવ વધારવા પડ્યા છે.
