વેરાવળમાં તુરક સમાજના પ્રમુખ પર સરાજાહેર ધાણીફૂટ ફાયરિંગ | In Veraval firing on the head of the Turkish community was widespread
કુખ્યાત એફએમ ગેંગની સંડોવણીનું અનુમાન : તાલાલા રોડ પર આંતરીને માથામાં ગોળી મારીને નાસી છૂટેલા 4 શખ્સોને પકડવા નાકાબંધી : ટોળા ઉમટતા ચુસ્ત બંદોબસ્ત
વેરાવળ, : વેરાવળ શહેરમાં આજે ભરબપોરે કાયદો અને વ્યવસ્થાની સ્થિતિના લીરેલીરા ઉડાવતી એક સનસનાટીભરી ઘટના સામે આવી છે. વેરાવળ-તાલાલા રોડ પર પેટ્રોલ પંપ પાસે ટ્રાફિકથી સતત ધમધમતા વિસ્તારમાં તુરક સમાજના પ્રમુખ પર ત્રણથી ચાર અજાણ્યા શખ્સોએ અચાનક સરાજાહેર રિવોલ્વરથી ફાયરિંગ કરી દીધું હતું. આ હુમલામાં ગંભીર ઈજા પહોંચતા લોહીલુહાણ હાલતમાં પ્રથમ સ્થાનિક ખાનગી હોસ્પિટલ અને ત્યારબાદ વધુ સારવાર માટે તાત્કાલિક જૂનાગઢ ખસેડવામાં આવ્યા હતા. જેમાં પ્રાથમિક તબક્કે કુખ્યાત એફએમ ગેંગની સંડોવણી બહાર આવી છે.
મળતી વિગતો મુજબ, વેરાવળના સોમનાથ ટોકીઝ વિસ્તારમાં રહેતા તુરક સમાજના પ્રમુખ જાવેદ મહમદ તાજવાણી પોતાની મોટરસાયકલ પર તાલાલા રોડ પરથી પસાર થઈ રહ્યા હતા. આ દરમિયાન પૂર્વ આયોજિત કાવતરાના ભાગરૂપે આવેલા હુમલાખોરોએ તેમને ઘેરી લીધા હતા. આરોપીઓએ તમંચા કે રિવોલ્વરમાંથી અનેક રાઉન્ડ ફાયરિંગ કર્યાં હતા. જેમાં એક કારતૂસ માથાના ભાગે ઘૂસી ગઈ હતી. ગોળી વાગતા જ તેઓ લોહીના ખાબોચિયામાં ત્યાં જ ઢળી પડયા હતા. ફાયરિંગની ઘટનાને અંજામ આપી તમામ હુમલાખોરો નાસી છૂટયા હતા.
બનાવની જાણ થતાં જ સ્થાનિક લોકોએ લોહીલુહાણ હાલતમાં જાવેદભાઈને ખાનગી હોસ્પિટલ પહોંચાડયા હતા, જ્યાં તેમની સ્થિતિ અત્યંત ગંભીર જણાતા ફરજ પરના તબીબોએ પ્રાથમિક સારવાર આપી જૂનાગઢ હોસ્પિટલ ખાતે રિફર કર્યા હતા. શહેરમાં સરાજાહેર ફાયરિંગના સમાચાર વાયુવેગે પ્રસરતા હોસ્પિટલ ખાતે સમાજના અને સ્થાનિક લોકોના મોટા ટોળા એકઠા થઈ ગયા હતા. પરિસ્થિતિ વણસે નહીં તે માટે પોલીસે સંવેદનશીલ વિસ્તારોમાં જડબેસલાક પોલીસ બંદોબસ્ત ગોઠવી દીધો છે.
