વડોદરા: મોબાઇલ શોપના એકાઉન્ટ મેનેજરે પત્નીની મદદથી 2.32 કરોડની ઉચાપત કરી, કોર્ટે 2 દિવસના રિમાન્ડ કર્યા મંજૂર | Vadodara News Mobile shop account manager embezzled Rs 2 32 crore 2 day remand granted
Vadodara News: સંગમ ચાર રસ્તા પાસે આવેલી મોબાઇલ શોપના એકાઉન્ટ મેનેજર તથા તેમની પત્નીએ કંપનીના બેન્ક એકાઉન્ટના પોર્ટલમાં ડેટા નાખી રૂ. 2.32 કરોડની ઉચાપત કરી હોવાની ફરિયાદ ગઇકાલે નોંધાયા બાદ પોલીસે બનાવમાં સંડોવાયેલા એકાઉન્ટન્ટની ધરપકડ કરી હતી. આજે આરોપીને અદાલતમાં રજૂ કરી તપાસ અધિકારીએ રિમાન્ડની માંગણી કરતા જ્યુ. મેજિસ્ટ્રેટે આરોપીના બે દિવસના રિમાન્ડ મંજૂર કર્યા હતા.
કેસની વિગત એવી છે કે, ખાનગી મોબાઈલ દુકાનમાં મિનલ મનોહરભાઇ ક્ષીરસાગર ઓગસ્ટ 2017થી એકાઉન્ટ મેનેજર તરીકે નોકરી કરતો હતો. ડિસેમ્બર 2025માં ઓડિટ કરાવવામાં આવતાં તેમાં જાણવા મળ્યું હતું કે, મિનલે ફરજ દરમિયાન પત્ની પ્રાચી સાથે મળી બનાવટી દસ્તાવેજો ઊભા કરી કંપનીના બેન્ક એકાઉન્ટના પોર્ટલમાં પોતાના અલગ-અલગ એકાઉન્ટ નંબરો નાખી ડિજિટલ રેકોર્ડ ઊભા કર્યા હતા.
તપાસમાં 57.80 લાખ પોતાના એકાઉન્ટમાં ચેકથી ટ્રાન્સફર કર્યા હોવાનું અને દુકાનમાં આવતી રોકડ રકમ પૈકી 1.75 કરોડની રકમ પોતાના એકાઉન્ટમાં જમા કરાવી કુલ રૂ. 2.32 કરોડની ઉચાપત કરી હોવાનું જણાયું હતું. આ બનાવ અંગે વારસિયા પોલીસે ગુનો દાખલ કર્યા બાદ આરોપી મીનલ ક્ષીરસાગરની ધરપકડ કરી હતી.
આજે આરોપીને અદાલત સમક્ષ રજૂ કરી આરોપીના રિમાન્ડની માંગણી કરાઇ હતી, રૂ. 2.32 કરોડની ઉચાપત કર્યા બાદ આ નાણાંથી કોઇ મિલકત વસાવી હોય તો તેની તપાસ કરવાની રજૂઆત કરવામાં આવી હતી. જ્યુ. મેજિસ્ટ્રેટે બન્ને પક્ષની દલીલ સાંભળ્યા બાદ આરોપી મિનલના બે દિવસના રિમાન્ડ મંજૂર કર્યા હતા.
