વડોદરામાં કોર્પોરેટર આશિષ જોશી સામે ખોટા પોલીસ કેસ મુદ્દે કોંગ્રેસનો હોબાળો | Congress creates ruckus over false police case against Vadodara corporator Ashish Joshi
Vadodara Congress : ભાજપમાંથી હકાલ પટ્ટી થયા બાદ કોંગ્રેસમાંથી કોર્પોરેશનની ચૂંટણી જીતી જનાર આશિષ જોશી સામે ચૂંટણી અગાઉ દારૂ મંગાવવા બાબતના સંખેડા પોલીસ મથકે થયેલા કથીત બોગસ કેસ બાબતે રાજ્યપાલને દરમિયાનગીરી અંગે અરજ કરતું આવેદનપત્ર કોંગ્રેસ દ્વારા વડોદરા જિલ્લા કલેક્ટરને આપવામાં આવ્યું હતું.
કોંગ્રેસની ટિકિટ પર પાલિકાની ચૂંટણી જીતી જનાર આશિષ જોષી સામે ચૂંટણી અગાઉ દારૂ મંગાવવા બાબતે સંખેડા પોલીસ મથકે ગુનો નોંધાયો હતો.
આ અંગે કોંગ્રેસ દ્વારા આક્રમક વલણ અપનાવવામાં આવ્યું હતું. ગુજરાતના રાજ્યપાલને આ કેસમાં દરમિયાનગીરી કરવા બાબતે જિલ્લા કલેકટર કચેરી ખાતે કોંગ્રેસી કાર્યકરોએ પ્લે કાર્ડ સાથે દેખાવો કરીને સૂત્રોચાર કરી કચેરી સંકુલ ગજાવી મૂક્યું હતું.
સંખેડા પોલીસ વિરુદ્ધના સૂત્રોચ્ચાર સહિત આશિષ જોશીને ન્યાય આપો, કેસ પાછા ખેંચો એવી માંગ સાથે પ્લે કાર્ડ દર્શાવ્યા હતા.
ગુજરાતના રાજ્યપાલને સંબોધીને જિલ્લા કલેકટરને અપાયેલા આવેદન પત્રમાં સંખેડા પોલીસ સ્ટાફ દ્વારા કોર્પોરેટર આશિષ જોશીને ફસાવવાના ઇરાદે કેવી રીતે પોલીસ કેસ ઊભો કરાયો તે બાબતેની સમગ્ર હકીકત દર્શાવવામાં આવી હતી.
