ગુજરાતમાં ગરમી સાથે મિનિ વાવાઝોડું, : 40થી 60 કિ.મી.ની ઝડપે પવન ફૂંકાયો | Mini storm with heat in Gujarat: Winds blowing at a speed of 40 to 60 kmph
દેશમાં ઉત્તરપ્રદેશમાં 130 કિ.મી. ઝડપે ક્ષણો પૂરતું સિવિયર સાયક્લોનક! : આજે રાજકોટ, સુરેન્દ્રનગર, કચ્છમાં હીટવેવ, અન્યત્ર પારો ઘટશે પણ તાપમાન 40 સે. ઉપર રહેવા સાથે અસહ્ય ગરમી જારી રહેશે
રાજકોટ, : આજે રાજ્યમાં 14 સ્થળોએ 41 સે.થી વધુ તાપમાન રહેવા સાથે હીટવેવ અને સિવિયર હીટવેવ જારી રહ્યો હતો અને તે સાથે મોસમમાં પલટો આવતા પવનની ગતિ વધી હતી. રાજ્યમાં સૂસવાટા મારતો વાવાઝોડા જેવો 40થી 60 કિ.મી.ની ઝડપે પવન ફૂંકાતા આંધીનો અનુભવ થયો હતો. મહારાષ્ટ્ર,ઉત્તરપ્રદેશમાં તો અલ્પ સમય માટે પણ સાયક્લોન તથા સિવિયર સાયક્લોન જેવો અતિ તીવ્ર પવન ફૂંકાતા વિનાશ વેરાયો હતો.
મોસમ વિભાગ અનુસાર કચ્છના ખાવડા ખાતે પવનની 61 કિ.મી. અને અંબાજી પાસે 37 કિ.મી.ની ઝડપ નોંધાઈ છે. રાજકોટમાં આજે મહત્તમ 35થી 40 કિ.મી.ની ઝડપે પવન ફૂંકાતા ધૂળની ડમરીઓ ઉડી હતી અને વૃક્ષો,હોર્ડીંગબોર્ડ ડગમગવા લાગ્યા હતા. રાજ્યમાં અન્યત્ર પણ 30- 40 કિ.મી.ની ઝડપે પવન ફૂંકાયો હતો.
ઉત્તરપ્રદેશના ડોગરાઈ, બરેલી ખાતે કલાકના 130 કિ.મી., શામલી, વારાણસી, ચુર્ક સહિત સ્થળે 91 કિ.મી.ઝડપે તેમજ મહારાષ્ટ્રમાં સતારા 96 કિ.મી., પુણે પંથકમાં 83 કિ.મી. તેમજ ઝારખંડ, બિહાર, ઓડીશા, જમ્મુ કાશ્મીર સહિત અનેક રાજ્યોમાં 65- 70 કિ.મી.ની ઝડપે વાવાઝોડા જેવો તીવ્ર પવન ફૂંકાયો હતો.
ગુજરાતમાં આજે અમદાવાદ, ગાંધીનગર, વલ્લભવિદ્યાનગર, વડોદરા, અમરેલી, ભાવનગર, રાજકોટ, સુરેન્દ્રનગર, કંડલા સહિત સ્થળે તાપમાન 43 સે.અને તેથી વધારે રહ્યું હતું જ્યારે ભૂજ, ડીસા, મહુવા,જુનાગઢમાં 40થી 42 સે. વચ્ચે રહ્યું હતું અને અસહ્ય અગનવર્ષા જારી રહી હતી. આવતીકાલે રાજકોટ,સુરેન્દ્રનગર, કચ્છ જિલ્લામાં હીટવેવની ચેતવણી છે જ્યારે અન્ય જિલ્લાઓમાં ક્રમશઃ તાપમાન ઘટશે પરંતુ, પારો 40 સે.ની ઉપર જારી રહેશે. આ સાથે ભેજનું પ્રમાણ વધતું હોય પરસેવે રેબઝેબ કરતો બફારો પણ જારી રહેશે.
