મોરબીના જૂના સાદુળકા ગામે પાણી ભરેલા ખાડામાં ડૂબી જતાં ૩ના મોત | 3 die after drowning in a water filled pit in Juna Sadulka village of Morbi
કરૂણાંતિકાના કારણે ગામમાં શોકનો માહોલ માલઢોર ચરાવવા ગયેલા કાકા-ભત્રીજા સહિત ત્રણ પાણીના ખાડામાં ન્હાવા પડતા ઉંડા પાણીના ગરક થયાનું પ્રાથમિક તપાસમાં ખુલ્યું
મોરબી, મોરબીના જૂના સાદુળકા ગામ પાસે પાણી ભરેલા ખાડામાં ડૂબી જતાં બાળક સહિત ત્રણના મોત થતા અરેરાટી ફેલાઇ છે. ત્રણ વ્યક્તિ ડૂબ્યાની માહિતી મળતા મોરબી ફાયર બ્રિગેડ ટીમ દોડી ગઇ હતી, અને કલાકોની જહેમત ઉઠાવી મૃતદેહો બહાર કાઢવામાં આવ્યા હતાં. કરૂણાંતિકાના પગલે ગામમાં શોકનો માહોલ છવાયો છે.
બનાવની પ્રાપ્ત વિગતો મુજબ મોરબી તાલુકાના સાદુળકા ગામે પાણીના ખાડામાં 3 લોકો ન્હાવા પડયા બાદ ડૂબી ગયાની માહિતી સવારે ૧૧ વાગ્યાના અરસામાં ફાયર બ્રિગેડ ટીમને મળી હતી. જેથી ફાયર ટીમના તરવૈયાઓ દોડી ગયા હતા, અને રેસ્ક્યૂ ઓપરેશન હાથ ધર્યું હતું. ફાયર બ્રિગેડની ટીમે ત્રણ કલાકથી વધુ સમય સતત શોધખોળ કર્યા બાદ બાદ ત્રણ મૃતદેહો બહાર કાઢવામાં આવ્યા હતા. હાથાભાઇ કુંજાભાઈ રાતડિયા (ઉ.વ. 28), તેનો ભત્રીજો જયદેવ સોંડાભાઈ રાતડિયા (ઉ.વ.11 ) અને કાળુભાઈ ગીગુભાઈ ભરવાડ (ઉ.વ. 31) એમ ત્રણ વ્યક્તિના ડૂબી જવાથી મોત થયા હતાં.
હાલ પ્રાપ્ત વિગતો મુજબ ત્રણેય મૃતકો માલઢોર ચરાવવા ગયા હતા. અને પાણીના ખાડામાં ન્હાવા ગયા બાદ ડૂબી જતાં મોત થયા છે. જો કે પોલીસ તપાસ બાદ વધુ વિગતો પ્રાપ્ત થશે. હાલ બનાવને પગલે ગામમાં શોકનું મોજું ફરી વળ્યું છે. પરિવારોમાં હૈયાફાટ રૂદનના દ્રશ્યો જોવા મળ્યા હતાં.
