અમૂલ દૂધ પીતા હૈ ઇન્ડિયા : રૂ.બે નો ધરખમ વધારો | India drinks Amul milk: A steep increase of Rs 2

– નયા ભારતમાં માઝા મૂકતી મોંઘવારી : ગરીબો માટે દૂધ અલભ્ય !

– ટી સ્પેશિયલના ભાવમાં લિટરે સૌથી વધુ રૂા. ત્રણનો વધારો જ્યારે ભેંસના દૂધના ભાવમાં રૂા. ચારનો વધારો ઝીંકાયો

– દૂધના ઉત્પાદન ખર્ચમાં વધારો થતાં દૂધ મોંઘુ થયું : મે 2025 પછી પહેલી વાર દૂધનો ભાવ વધારો કરાયો

અમદાવાદ: ગુજરાત કોઓપરેટીવ મિલ્ક માર્કેટિંગ ફેડરેશનના નેજા હેઠળ સક્રિય અમૂલે તેના દૂધની દરેક વરાયટીઓના લિટરદીઠ ભાવમાં રૂા. ૧થી ૪નો વધારો કરવાની જાહેરાત કરી છે. ટી સ્પેશિયલના એક લિટરની થેલીના ભાવમાં રૂા. ૩નો વધારો કરવામાં આવ્યો છે. તેમ જ ભેંસના દૂધની ૫૦૦ મિલીલિટરની થેલીના ભાવમાં રૂા. ૨નો વધારો કર્યો છે. આમ ભેંસના દૂધના એક લિટરના ભાવમાં રૂા. ૪નો વધારો થયો છે. ભેંસના દૂધનો લિટરદીઠ ભાવ વધીને રૂા. ૭૮ થશે.આ ભાવ વધારો ૧૪મી મે ૨૦૨૬થી લાગુ પડી જશે. 

અમૂલના મેનેજિંગ ડિરેક્ટર જયન મહેતાનું કહેવું છે કે મહત્તમ વેચાણ કિંમતમાં ટકાવારીની દ્રષ્ટિએ અઢીથી માંડીને સાડા ત્રણ ટકાનો જ વધારો થયો છે. ખાદ્યસામગ્રીના ફુગાવાના દર કરતાં ગુજરાતના ફુગાવાના દર વધારે મોટા છે. પહેલી મે ૨૦૨૫ના દૂધના ભાવમાં વધારો કર્યા પછી પહેલીવાર ૧૪મી મે ૨૦૨૬માં દૂધના ભાવમાં વધારો કરવામાં આવ્યો છે. દૂધના ઉત્પાદન ખર્ચમાં વધારો થતાં દૂધના ભાવમાં વધારો કરવામાં આવ્યો છે. જોકે અમૂલ બટર, ચીઝ, ઘી કે આઈસક્રીમના ભાવમાં નજીકના ભવિષ્યમાં વધારો કરવાનું આયોજન ન હોવાનો સંકેત તેમણે આપ્યો છે. 

તેમણે જણાવ્યું હતું કે પશુઆહારના, દૂધના પેકેજિંગ માટેની ફિલ્મના અને બળતણના ભાવમાં નોંધપાત્ર વધારો થયો હોવાથી તેમને ભાવ વધારો કરવાની ફરજ પડી છે. છેલ્લા એક વર્ષમાં ગુજરાતના તમામ દૂધ સંઘોએ ફેટની કિંમતમાં ૩.૭ ટકાનો વધારો કરી આપીને કિલોદીઠ ફેટનો ભાવ રૂા.૩૦નો કરી આપવામાં આવ્યો છે.

અમૂલ દ્વારા ગ્રાહકો પાસેથી વસૂલવામાં આવતા નાણાંમાંથી ૮૦ ટકા નાણાં પશુપાલકોને પરત કરવામાં આવે છે. દૂધના ભાવમાં કરવામાં આવેલા વધારાનો મોટો હિસ્સો પશુપાલકોને ફાળે જ જશે. તેમને ભાવમાં વધારો મળતાં દૂધનું ઉત્પાદન વધારવા માટે વધારાનું ધ્યાન આપશે.

દૂધના ભાવમાં કરવામાં આવેેલો વધારો ગૃહિણોનો ઘરખર્ચ વધારનાર સાબિત થશે. જોકે તેને કારણે અમૂલની આવકમાં વધારો થશે. ગુજરાત કોઓપરેટીવ મિલ્ક માર્કેટિંગ ફેડરેશનની આવક ૨૦૨૪-૨૫માં ૧૧.૪ ટકા વધીને રૂા. ૭૩,૪૫૦ કરોડની થઈ હતી. બીજીતરફ ૨૦૨૫-૨૬ના નાણાંકીય વર્ષમાં અમૂલનું ટર્નઓવર વધીને રૂા. ૧ લાખ કરોડનો વળોટી ગયું હતું. ડેરી પ્રોડક્ટ્સની ડિમાન્ડ વધી જતાં ગુજરાત કોઓપરેટીવ મિલ્ક માર્કેટિંગ ફેડરેશનની આવકમાં વધારો થયો હતો. 

ગુજરાત કોઓપરેટીવ મિલ્ક માર્કેટિંગ ફેડરેશન વિશ્વનું સૌથી મોટી ડેરી સહકારી સંસ્થા છે. તેની સાથે અંદાજે ૩૬ લાખ પશુપાલકો અને ખેડૂતો જોડાયેલા છે. અમૂલ દૂધ અને દૂધની બનાવટો વિશ્વના ૫૦થી વધુ દેશોમાંગ અમૂલ દૂધ અને દૂધની બનાવટોનું વેચાણ કરે છે. અમૂલ રોજની ૩.૧૦ કરોડ લિટર દૂધ એકત્રિત કરે છે. અમૂલના ૨૪ અબજ પેકિંગ્સનું એક વર્ષમાં વિતરણ અને વેચાણ કરે છે. તેમાં અમૂલ બટર, દૂધ, ચીઝ, આઈસક્રીમનો સમાવેશ થાય છે. 

– મધર મિલ્ક ડેરીએ પણ લિટરદીઠ ભાવમાં રૂા. 2નો વધારો કર્યો

મધર ડેરીએ પણ દૂધના લિટરદીઠ ભાવમાં ૧૪ મેથી અમલમાં આવે તે રીતે રૂા.૨નો વધારો કર્યો છે. મધર ડેરીએ આ અગાઉ એપ્રિલ ૨૦૨૫માં દૂધના ભાવમાં વધારો કર્યો હતો. આ વધારાને પરિણમે ખેડૂતોની આવકમાં છ ટકાનો વધારો થયો છે. મધર ડેરી રોજના ૩૫ લાખ લિટર દૂધનું વેચાણ કરે છે.