સુરત શહેર પ્રમુખે પ્રદેશે નિયુક્ત કરેલા હોદ્દેદારોને નોટિસ આપ્યા બાદ સોશિયલ મીડિયામાં પોસ્ટ વોર | Post war on social media after Surat city president issues notice to state appointed office bearers
Surat Corporation : સુરત પાલિકાની ચૂંટણી પહેલા કોંગ્રેસમાં શરૂ થયેલી જુથબંધી હજી પણ બંધ થવાનું નામ લેતી નથી. પાલિકાની ચૂંટણી પુરી થઈ ગઈ છે પરંતુ કોંગ્રેસના આંતરિક વિખવાદ પુરા થવાનું નામ લેતા નથી. પાલિકાની ચૂંટણીમાં અનેક કાર્યકરોએ પક્ષ વિરોધી પ્રવૃત્તિ કરી હોવાની ફરિયાદ થઈ હતી. જેમાં શહેર પ્રમુખે પ્રદેશના હોદ્દેદારને નોટિસ આપતા સોશિયલ મીડિયામાં પોસ્ટ વોર શરુ થઈ ગયું છે. એટલું જ નહી પરંતુ પ્રદેશ હોદ્દેદારે પોતે પક્ષ વિરુદ્ધ કામ કર્યું હોય તો પુરાવા જાહેર કરવા ચેલેન્જ કરવા સાથે શહેરના નેતૃત્વને બાળ નેતૃત્વ ગણાવી વિવાદ ઉભો કર્યો છે.
સુરત પાલિકાની ચૂંટણી પહેલા અને હવે ચૂંટણી બાદ કોંગ્રેસના નેતાઓ ભાજપ સામે લડવાની જગ્યાએ એક બીજા સામે મોરચો માંડી રહ્યાં છે. સુરત પાલિકાની ચૂંટણીમાં મતદાન પુરુ થયું છે પરંતુ કોંગ્રેસના મતભેદ પુરા થવાનું નામ લેતા નથી. આ ચૂંટણી બાદ શહેર પ્રમુખ વિપુલ ઉધનાવાલાએ ગુજરાત પ્રદેશ કોંગ્રેસ સમિતિના સોશિયલ મીડિયા વિભાગમાં મહામંત્રી રાજુભાલાળાને પક્ષ વિરોધી પ્રવૃત્તિ માટે નોટિસ આપી હતી. આ નોટિસનો જવાબ આપવા સાથે પત્ર સોશિયલ મીડિયા પર વાયરલ કર્યો છે.
પોસ્ટમાં લખ્યું છે ભારતીય રાષ્ટ્રીય કોંગ્રેસના બંધારણની સમજણ વગરનું સુરત શહેર બાળ નેતૃત્વ આ ઉપરાંત સાચા કાર્યકરોને બદનામ કરવામાં આવી રહ્યા હોવાનો આક્ષેપ કર્યો છે. શહેર પ્રમુખને લખેલા પત્રમાં લખ્યું છે, હું ગુજરાત પ્રદેશ કોંગ્રેસ સમિતિના સોશિયલ મીડિયા વિભાગમાં મહામંત્રી તરીકે હોદ્દો ધરાવું છું, તો આપ દ્વારા સુરત શહેરના પ્રમુખ તરીકે મને કઈ રીતે સસ્પેન્ડ કરી શકો? પાર્ટી વિરુધ્ધ ની ફરિયાદ છે તે તેના પુરાવા જાહેર કરવામાં આવે તેવી માગણી કરી છે.
નોટિસ બહાર આવતા જ સોશિયલ મીડિયા પ્લેટફોર્મ પર એકબીજા સામે આક્ષેપ થઈ રહ્યો છે. શહેર કોંગ્રેસમાં ચાલતી આ પોસ્ટ વોર અને જૂથબંધી કોણ અટકાવશે તે અંગે કાર્યકરોમાં પણ અનેક અટકળો ચાલી રહી છે. કોંગ્રેસ માટે ચૂંટણી હાર કરતા આંતરિક લડાઈ મોટો પડકાર બની ગઈ હોવાનું કહેવાઈ રહ્યું છે.
